Almatyda beınekameralardyń kómegimen 1,5 myń qylmys ashyldy
ALMATY. QazAqparat – Almatyda jedel basqarý ortalyǵyndaǵy beınekameralardyń arqasynda 1,5 myń qylmys ashylyp, 800 myń ákimshilik quqyq buzýshylyq anyqtaldy, dep habarlaıdy QazAqparat tilshisi.
Polıtsııa departamentiniń bastyǵy jańa tehnologııalardy qoldaný - qylmysty azaıtýda jaqsy nátıje kórsetip jatqanyn aıtty.
«Jedel basqarý ortalyǵyna qosylǵan 12 myń kameranyń kómegimen ótken jyly 1,5 myń qylmys ashyldy, 800 myń ákimshilik quqyq buzýshylyq anyqtaldy. Qala ákiminiń qoldaýymen bıyl taǵy 3 myń beınebaqylaý kamerasy ornatylady. Olardyń kópshiligi aýlalardy, saıabaqtardy, alańdardy jáne basqa da adamdar jappaı shoǵyrlanatyn oryndardy qamtıdy», – dedi Qanat Taımerdenov.
Onyń aıtýynsha, beınebaqylaý júıelerimen jumys isteýdiń oń áseri - urlyq, onyń ishinde qalta urlyǵy azaıǵan.
«Byltyr biz mýnıtsıpaldy avtoparktermen jumys istedik. Kezdesýler uıymdastyrylyp, sonyń arqasynda qoǵamdyq kólikterdiń barlyǵyna derlik beınebaqylaý kameralary ornatyldy. Bul qalta urlyǵynyń tirkelýin 70-ke deıin qysqartýǵa, olardyń ashylýyn 25%-ǵa arttyrýǵa múmkindik berdi. Alaıda, qalaǵa Almaty oblysynan keletin kólikter beınebaqylaý kameralarymen qamtamasyz etilmeı qaldy. Biz bul jumysty jalǵastyramyz», – dedi ol.
Eske salsaq, Almatyda ýchaskelik ınspektorlar sany kóbeıdi.