Almatyda beıbit jınalystar týraly zań jobasynyń tujyrymdamasy qoǵam nazaryna usynyldy

ALMATY. QazAqparat – Almatyda QR Aqparat jáne qoǵamdyq damý mınıstri Dáýren Abaev qoǵamdyq keńestiń otyrysynda «Qazaqstan Respýblıkasynda beıbit jınalystar, sherý, pıketter, demonstratsııalyq jınalystardy ótkizý men uıymdastyrý tártibi týraly» jańa zań jobasynyń kontseptsııasyn kópshilik talqylaýyna usyndy, dep habarlaıdy QazAqparat tilshisi.

Jýrnalıst Sergeı Ponomarev túsirgen vıdeolardy quqyq qorǵaý organdaryna tapsyrý týraly pýnktti artyq dep sanaıtynyn aıtty.

«Men 30 jyl telearnada tájirıbem bar tilshimin. Bir jerge baryp túsirilim jasadym delik. Ol meniń taýyp otyrǵan nápaqam. Maǵan sol kezde AІІB basshysy nemese prokýror kelip, vıdeony maǵan berińiz, maǵan kerek deıdi. Túsirgen vıdeomaterıalymdy soǵan beremin. Ol 2-3 kúnde qaıtarsa jaqsy. Biraq ol kezde materıal ózektiligin joǵaltady. Meniń oıymsha bul qajetsiz pýnkt. Bizdi adamdarǵa aqparat jetkizý múmkindiginen aıyryp otyr», - dedi jýrnalıst.

Dáýren Abaev bul pýnktti túzetý kerektigin aıtty.

«Eger másele qylmystyq jaýapkershilik týrly bolsa, vıdeo dálelder bazasy úshin jınalýy múmkin. Ol jaǵdaıda da birden emes, belgili bir ýaqyttan soń. Bul sizderdiń jep otyrǵan nandaryńyz, men ony túsinemin», - dedi D.Abaev.

Belgili jýrnalıst tilshilerdi basqalardan ajyratý úshin jılet kııý shartyna qarsy ekendigin aıtty.

«Keıde jýrnalıster qoǵammen birge bolǵysy keledi. Bul bizdi qorǵaý úshin jasalyp otyrǵanyn túsinip turmyn. Alaıda bul pýknt te kúmán týǵyzady», - dedi Sergeı Ponomarev.

Alaıda mınıstr jýrnalısterdiń qaýipsizdigi eń mańyzdy másele ekendigin aıtty.

Bolashaqta qaıǵyly jaǵdaı bolmas úshin onyń aldyn alǵan abzal.