Almatyda «Bes qarý» áskerı klýby mektep oqýshylaryn jınady

ALMATY. QazAqparat - Almatyda QR Qarýly kúshteriniń 25 jyldyǵyna oraı, Qorǵanys mınıstrliginiń Radıoelektronıka jáne baılanys áskerı ınjenerlik ınstıtýtynda «Bes qarý» áskerı patrıottyq klýbynyń uıymdastyrýymen mektep oqýshylary arasynda áskerı-sporttyq saıys ótti, dep habarlaıdy QazAqparat tilshisi. 

Sharany atalǵan ınstıtýt janyndaǵy «Bes qarý»  áskerı-patrıottyq klýby men Almaty qalasy Jastar saıasatyn damytý qory birlesip uıymdastyrdy. «Bes qarý» klýbynyń jetekshisi polkovnık Arman Januzaqulynyń aıtýynsha, mundaı sharalar toqsan saıyn uıymdastyrylyp turady.

«Mundaı sharalardy mektep oqýshylarynyń áskerı mamandyqqa qyzyǵýshylyǵyn arttyrý úshin uıymdastyramyz. Toqsan saıyn ótkizip otyramyz. Bizdiń ınstıtýtqa túskisi keletin oqýshylar fızıka-matematıka pánderine qabiletti bolýy kerek. Oqý ornyna tilek bildirýshi túlekterdiń qatary jyldan-jylǵa artyp keledi. Olar oqý ornyn bitirgen soń leıtenant ataǵyn alyp, elimizdiń túkpir-túkpirine qyzmet etýge attanady», - dedi A.Januzaquly.