Almatyda bes baý-baqsha seriktestigi jeke turǵyn úı qurylysyna aýysty
«Qala qurylysynyń naqty talaptary bolady. Onda tehnıkaǵa, kommýnıkatsııaǵa jáne basqasyna qoljetimdilik qajet. Sondaı-aq onda qala standarttary saqtalýy qajet. Eger biz ony jasaı almasaq, qalanyń baý-baqsha sharýashylyǵyn JTQ-ǵa aýystyra almaımyz. Bizge kommýnıkatsııany ornatýǵa ınjenerlik dálizder qajet, ol kem degende 7 metr bolady. Basqasha jolmen oǵan tehnıka kire almaıdy. Ókinishke oraı, baý-baqsha sharýashylyǵynyń jekelegen turǵyndary buǵan kelispeı otyr. Osyǵan oraı, jumystardy bastaı almaı otyrmyz. Bizge turǵyndardyń 100% kelisimi kerek. Eger qala ákiminiń zań júzinde múmkindigi bolsa, onda men qýanyshpen baý-baqsha sharýashylyǵyn jeke turǵyn-úı qurylysyna aýystyrar edim», - dedi Erbolat Dosaev.
Ol sondaı-aq bul másele boıynsha arnaıy komıssııa qurylǵanyn aıtty.
«Jaqynda komıssııanyń alǵashqy otyrysy ótedi. Qazir materıaldar jınaý ústindemiz. Aıtý kerek, komıssııa uzaq merzimge, ıaǵnı, 2027 jyldyń 1 qańtaryna deıin jumys isteıdi. Qazirgi tańda qalanyń Medeý aýdanyndaǵy 109 baý-baqsha seriktestiginiń tek 5-ýin ǵana JTQ-ǵa aýystyrýǵa sáıkes keledi. Olardy aýystyryp jatyrmyz. Sebebi, onda kommýnıkatsııa boıynsha ınjenerlik dálizder men basqa da múmkindikteri bar. Al qalǵan 104 seriktestik boıynsha jumystar júrgizilýde. Biz aldymen olardy JTQ-ǵa aýystyra alamyz ba, sony túsinýimiz kerek», - dedi Almaty ákimi.
