Almatyda berishti menıngıttiń órshýi bolmaıdy
ALMATY. QazAqparat - Astanada shilde aıynda «berishti menıngıt» dertiniń 80 juqtyrý jaǵdaıy tirkeldi. Bul kórsetkish ózge aımaqtardyń epıdemıologııalyq ahýalyna qalaı yqpal etýde? Atalǵan derttiń negizgi qozdyrǵyshy enterovırýs juqpasy Almatynyń turǵyndaryna qaýip tóndire me? Osy jáne ózge de suraqtarǵa jaýap alý úshin qalalyq tutynýshylardyń quqyǵyn qorǵaý departamentiniń juqpaly jáne parazıttik aýrýlardy baqylaý bóliminiń jetekshisi Olga Asaevaǵa habarlastyq.
- Almatyda berishti menıngıttiń órshýi tirkelýi múmkin be?
- Joq, Almatyda «berishti menıngıttiń» qozdyratyn enterovırýs juqpasy áli tirkelgen joq. Sondyqtan, atalǵan aýrýdyń órshýi bolmaıdy.
- Jyl basynan beri osy dertke shaldyqqandardyń sany jaıly aıta alasyz ba?
-Jyl basynan beri Almatyda atalǵan dertke shaldyǵýdyń 41 jaǵdaıy tirkeldi. Alaıda, zerthanalyq qorytyndylarǵa sáıkes naýqastardan enterovırýs tabylmady. Aýyrǵandardyń 78 paıyzy 7-14 jastaǵy balalar. Bul naýqastar bir-birimen baılanysty emes. Ujymdyq jumys oryndarynda mekememen baılanysy joq birli-jarym syrqat kezdesti. Naýqastarmen júrgizilgen saýalnama barysynda olardyń 30 paıyzy ashyq sý qoımalarynda shomylǵandyǵy anyqtaldy. Qalǵan 70 paıyzynyń syrqattaný sebebi anyqtalmady.
- Juqpaly aýrýdyń betin qaıtarý úshin qandaı aldyn alý sharalary júrgizilýde?
- Departament tarapynan epıdemıologııalyq ahýal kúndelikti qadaǵalanady. Barlyq berishti menıngıtti juqtyrý jaǵdaıy zerthanalyq turǵydan zertteledi. Enterovırýs juqpasynyń qorshaǵan ortadaǵy qozǵalysyn anyqtaý úshin ashyq sý qoımalaryndaǵy, sýburqaqtardaǵy, haýyzdardaǵy sý zerthanalyq tekserýden ótedi. Sondaı-aq, aýyz sý júıesi únemi baqylaýda. Qazir qaladaǵy aýyz sýmen qamtý júıesi barlyq talaptarǵa jaýap beredi. Kúmándi kórsetkishter tabylmady.
- Qalanyń jalpy epıdahýaly týraly ne aıtasyz?
- Qazir qaladaǵy juqpaly jáne parazıttik aýrýlarǵa qatysty epıdemıologııalyq ahýal turaqty. Jedel ishek juqpalary - 100 myń adamǵa shaqqanda 19,7 kórsetkishti, A vırýsty gepatıti 100 myń adamǵa shaqqanda 6,9 kórsetkishti qurady. Bul ótken jyldaǵy kórsetkishke parapar. Al, jedel respıratorly vırýstyq juqpa kórsetkishi ótken jylǵymen salystyrǵanda 15 paıyzǵa tómendedi. Balalarǵa arnalǵan ujymdyq mekemelerde jappaı naýqastaný tirkelmedi.
- Suhbatyńyza rahmet!
