Almatyda belgisiz er adam oqýshy balaǵa shabýyldady

ALMATY. QazAqparat - Almatyda kópqabatty úıdiń kireberisinde belgisiz er adam mektep oqýshysyna shabýyl jasady, dep habarlaıdy QazAqparat tilshisi.

Bul týraly oqýshynyń anasy áleýmettik jelide jazdy.

Áıeldiń aıtýynsha, uly podezden shyǵyp bara jatqanda kútpegen jerden beıtanys adam murnynan birneshe ret soqqan.

«Bul adam 21 sáýir kúni keshki saǵat 21:05 shamasynda «Tastaq» yqshamaýdanynda ornalasqan kópqabatty úıdiń kireberisinde meniń ulyma negizsiz shabýyl jasady. Ulym ony tanymaıdy, birinshi ret kórip tur. Meniń oıymsha, ol esirtkige táýeldi adam bolýy múmkin. Ony bizdiń úıdiń turǵyndarynyń eshqaısysy tanymaıdy. Ol týraly aqparat joq. Shabýyldyń vıdeosy bar, biz polıtsııaǵa júginip, aryz jazdyq», - dep jazdy almatylyq áıel.

Qalalyq Polıtsııa departamenti bul fakti sotqa deıingi tergep-tekserýdiń biryńǵaı tizilimine tirkelgenin málim etti.

«Almaly aýdandyq polıtsııa basqarmasy sotqa deıingi tergeý jumystaryn júrgizip jatyr. Tergeý aıaqtalǵannan keıin tolyq aqparat beremiz», - dedi Almaty qalalyq Polıtsııa departamenti bastyǵynyń orynbasary Rýstam Ábdrahmanov.