Almatyda belgisiz er adam kóshede qyzdy soqqyǵa jyqty

ALMATY. QazAqparat - 28 jastaǵy Almaty turǵynyna belgisiz er adam shabýyl jasady, dep habarlaıdy QazAqparat tilshisi.

Jábirlenýshiniń aıtýynsha, ony beıtanys er adam esh sebepsiz soqqyǵa jyqqan.

«Keshe túnde úıdiń mańynda beıtanys adam maǵan shabýyl jasap, basymnan qan shyqqansha, aıamaı uryp, sosyn ózi kelgen jaqqa qaraı qashyp ketti. Men dereý polıtsııaǵa habarlastym, alaıda olar áli beınekameralardy teksergen joq. Onyń túrin esimde saqtap qaldym. Men bul isti jaýyp tastaıma dep qorqamyn», - dep jazdy jábirlenýshi Instagram-daǵy paraqshasynda.

Almaty qalalyq polıtsııa departamenti bul fakti QR Qylmystyq kodeksiniń 293-baby «Buzaqylyq» boıynsha sotqa deıingi tergep-tekserýdiń biryńǵaı tizilimine tirkelgenin málim etti.

«Qyzdyń alǵan dene jaraqatynyń aýyrlyǵyn anyqtaý úshin sot-medıtsınalyq saraptama taǵaıyndaldy. Bul oqıǵa 16 tamyzǵa qaraǵan túni Medeý aýdanynda bolǵan. Tergeý barysy qalalyq polıtsııa basshylyǵynyń baqylaýyna alyndy», - dep atap ótti Almaty qalalyq polıtsııa departamentiniń resmı ókili Saltanat Ázirbek.

Foto: instagram.com