Almatyda belgisiz bireýler bıznesmenniń qyzyn urlap, 500 myń dollar talap etken
ASTANA. QazAqparat - Almatyda bıznesmenniń kámeletke tolmaǵan qyzyn urlady degen kúdikpen tórt adam ustaldy, dep habarlaıdy QR ІІM baspasóz qyzmeti.
Almaty polıtsııa departamenti qylmystyq polıtsııa qyzmetkerleri bıznesmenniń kámeletke tolmaǵan qyzyn urlap ketti degen kúdikpen tórt adamdy ustady.
Qaskóıler bıznesmennen qyzy úshin jarty mıllıon AQSh dollary mólsherinde ótemaqy talap etken.
«Qylmys 14 qarasha kúni kúndiz, qaladaǵy shaǵyn aýdandardyń biriniń aýlasynda bolǵan. Qylmyskerler elektroshokerdiń kómegimen júrgizýshini baılap, salonda otyrǵan qyzdy ashyqtan-ashyq urlap ketken. Artynsha ata-anasyna habarlasyp, ótemaqy talap etken», - delingen habarlamada.
Qazirgi kezde tergeý organdary ustalǵandardyń osy iske qatysyn tekserip jatyr.
«Qyzdyń ómiri men densaýlyǵyna eshqandaı qaýip-qater tónip turǵan joq», - deıdi QR ІІM ókilderi.
