Almatyda belgili zańger, ǵalym Ǵaırat Saparǵalıevtiń 80 jasqa tolý mereıtoıyna arnalǵan halyqaralyq ǵylymı-tájirıbelik konferentsııa ótip jatyr
ALMATY. Maýsymnyń 12-i. QazAqparat /Erbol Azanbek/ - Abaı atyndaǵy Qazaq Ulttyq pedagogıkalyq ýnıversıtetinde QR UǴA akademıgi, zań ǵylymdarynyń doktory, professsor Ǵaırat Saparǵalıevtiń 80 jasqa tolý mereıtoıyna arnalǵan «Qazaqstandaǵy konstıtýttsıonaldyq júıeniń damýy» atty halyqaralyq ǵylymı-tájirıbelik konferentsııa ótip jatyr, dep habarlaıdy QazAqparat.
Sharaǵa belgili ǵalymnyń áriptesteri, Qazaqstan men Reseı, Qyrǵyzstan, Ózbekstan ǵalymdary qatysýda. «Ǵaırat Saparǵalıuly táýelsiz Qazaqstannyń zań ǵylymynyń qalyptasýyna, Ata Zańymyzdyń jasalýyna belsene úles qosqan aıtýly tulǵalardyń biri. Onymen qatar onyń qalamynan zań ǵylymy salasyna qatysty birneshe oqýlyqtar men zertteý eńbekteri jaryq kórgen. Ǵaırat Saparǵalıuly Qazaqstannyń zań ǵylymy salasyndaǵy eń jarqyn, kórnekti tulǵalardyń biri. 80 jasqa deıin zańger mamandardyń daıyndalýyna belsene úles qosyp keledi», dedi konferentsııany ashqan QazUPÝ rektory Serik Pirálıev. Onyń aıtýynsha, qazirgi Qazaqstannyń zań salasynda qyzmet etetin kórnekti tulǵalardyń kópshiligi Ǵaırat Saparǵalıulynan tálim alǵan shákirtter. Olardyń sany búginde 500-ge jýyqtaıdy.
Konferentsııa barysynda jasalýyna Ǵaırat Saparǵalıuly belsene aralasqan QR Ata zańyn, QR Qylmystyq kodeksin jetildrý syndy baǵyttar boıynsha 50-den astam baıandama jasalmaq. Konferentsııa materıaldary aldaǵy ýaqytta kitap bolyp jaryq kóredi.
Ǵaırat Saparǵalıev 1930 jylǵy maýsymnyń 26-synda Semeı oblysynyń Jańasemeı qalasynda dúnıege kelgen. Saratov zań ınstıýtynyń túlegi. 36 jasynda doktorlyq qorǵaǵan KSRO-niń eń jas ǵylym doktorlarynyń biri. QR UǴA aspıranty, kishi ǵylymı qyzmetkeri, aǵa ǵylymı qyzmetker, dırektordyń orynbasary, QR UǴA fılosıofııa jáne quqyq ınstıtýtynyń bólim bastyǵy, Abaı atyndaǵy AlMÝ-dyń zań fakýltetiniń dekany, Qazaq gýmanıtarlyq zań ýnıversıtetiniń Memleket jáne quqyq ınstıtýtynyń dırektory qyzmetterin atqarǵan. Onyń 370-ten astam ǵylymı eńbegi bar. Olardyń qatarynda táýelsiz Qazaqstannyń zań ǵylymyna eleýli úles qosqan «Qazaqstan Respýblıkasyndaǵy konstıtýtsııalyq qurylymnyń qalyptasýy», «Konstıtýtsııalyq jaýapkershiliktiń problemalary», «Táýelsiz Qazaqstanda memlekettik qyzmetti reformalaýdyń quqyqtyq problemalary» syndy eńbekteri bar. Qazaqstannyń eńbek sińirgen zań qyzmetkeri, «Qurmet» ordeniniń, birqatar medaldardyń ıegeri.
