Almatyda belgili teatr synshysy Áshirbek Syǵaıǵa memorıaldy taqta ornatyldy

ALMATY. QazAqparat- Almatyda memleket jáne qoǵam qaıratkeri, Memlekettik syılyqtyń laýreaty, jazýshy, teatr synshysy, professor Áshirbek Syǵaıdyń qurmetine memorıaldy taqta ornatyldy, dep habarlaıdy QazAqparat tilshisi.

Sharaǵa Almaty qalasy ákiminiń orynbasary Arman Qyryqbaev, zııaly qaýym ókilderi men jazýshynyń týǵan-týystary qatysty

«Bul - tarıhı mańyzdy sheshim. Búgin asa kórnekti teatr uıymdastyrýshysyna jáne synshysyna, qazaq óneriniń shynaıy jankúıerine eskertkish taqta ornatyldy. Áshirbek aǵanyń shyǵarmashylyq ómiri bizdiń súıikti qalamyzben tyǵyz baılanysty. Onyń esimi, murasy halqymyzdyń jadynda, shákirtteriniń esinde máńgi qalady», – dep atap ótti Almaty ákiminiń orynbasary Arman Qyryqbaev.

Memorıaldyq taqta belgili teatr synshysy 1980-1999 jyldar aralyǵynda 20 jylǵa jýyq turǵan Jibek joly kóshesi, 12A (S. Máýlenov kóshesiniń qıylysy) mekenjaıyndaǵy úıdiń qabyrǵasyna ornatyldy.

Áshirbek Syǵaı - Qazaqstannyń sahna óneriniń damýyna eleýli úles qosty, qazaq teatrtaný ǵylymynyń negizin salýshylardyń biri.

«Іńkár shaq» (1978), «Syr sandyq», «Sahnaǵa sapar», «Jarnama aldyndaǵy oı», «Sahna sańlaqtary» (1998), «Teatr taǵylymy» (2003), «Án - taǵdyr», «Tańǵajaıyp teatr» jáne basqa shyǵarmalardyń avtory.

Onyń eńbekteri óner jáne teatr teorııasy salasyndaǵy oqýlyqqa aınaldy.