Almatyda belgili tarıhshy Muhammed Haıdar Dýlatı jaıynda kitap jaryq kórdi

Atalmysh kitap "Tarıh taǵylymy" baspasynan orys tilinde 1000 danamen basylyp shyqty. Kitap parsy tilinen aýdarylǵan. Kitapty orys tilinde jınaqtap, shyǵarǵan -tarıhshy, ǵalym Sattar Májıtov pen Dinbasy Ábsattar qajy Derbisáli. Parsy tilinen aýdarǵan - belgili ǵalym Klavdııa Pışýlına, al, aǵylshyn tilinen aýdarylýyna zor eńbek sińirgen aýdarmashylar - Marııam Mákisheva men Alma Murtaza.

"Kitap bes bólimnen turady. Basylym úndilik olıgarh, Delı ýnıversıtetiniń professory Mansýr Haıdardyń aǵylshyn tilinde jazǵan "Muhammed Haıdar Dýlatı parsy derekterinde" dep atalatyn kitaptan aýdarylǵan. Kitapta onyń Kashmırge qalaı kelgeni, onda qandaı qyzmet atqarǵany, uzaq ýaqyt júrgizgen bıligi syndy ár túrli derekter, orta ǵasyrlyq avtorlardyń eńbekterinen keltirilgen. Kitapty qazaq-úndi ǵalymdarynyń birikken ortaq eńbeginiń jemisi jáne iri tulǵany zertteýdegi alǵashqy kólemdi bastama dep aıtýǵa ábden bolady. Bul eńbektiń halqymyz úshin qanshalyqty qundylyǵyna qalyń oqyrman men ony zertteýshi ǵalymdar baǵa bere jatar",-dedi kitaptyń shyǵýyna úlken úles qosqan tarıhshy, ǵalym Sattar Májıtov.

Onyń aıtýynsha, kitap basylymǵa tórt jyl daıyndalǵan.

"Qazaq halqynyń tarıhı-mádenı murasynda Muhammed Haıdar Dýlatıdiń murasy erekshe oryn alady. Ol orta ǵasyrdyń tanymal memleket qaıratkeri, tarıhshy-ǵalymy, aqyn- dana tulǵasy bolǵan. Ol - "Qazaq tarıhynyń Gerodoty". Sondyqtan uly tulǵanyń baǵa jetpes jazba muralary tereńinen zerttelýi kerek, arnaıy ekspedıtsııalar jasalynyp, ǵylymı zertteýler júrgizý kerek. Onyń zertteýleri "Mádenı mura" baǵdarlamasyna engizilip, Mysyrda Sultan Beıbarstyń, Sırııada ál-Farabıdiń meshitterin óńdep jatqandaı, Úndi elindegi Muhammed Haıdar Dýlatıdiń qabiri de óńdelse degen úlken usynysymyz bar"-dedi elimizdiń Bas múftıi Ábsattar qajy Derbisáli.