Almatyda belgili sýretshi Serjan Báshirovtyń «Altaı jańǵyryǵy» atty jeke kórmesi ashylady
ALMATY. 8 maýsym. QazAqparat /Ádilet Musahaev/ - Qazaqstandyq tanymal zerger Serjan Báshirovtyń toptamasyndaǵy HІH ǵasyrdyń sońy - HH ǵasyrdyń basyndaǵy qazaqtardyń zergerlik áshekeıleri, avtorlyq jumystary - ınstallıatsııalary men ózindik áshekeıleri kórmege qoıylmaq.
Sýretshiniń týyndylary bizdiń elimizden tys jerlerde de keńinen tanymal. Onyń eńbekteri Altyn jáne baǵaly metaldar murajaıynda (Astana qalasy), Shyǵys halyqtarynyń murajaıynda (Máskeý qalasy), Azııa jáne Tynyq muhıt murajaıynda (Varshava qalasy) saqtalýda.
Onyń ózindik qoltańbasy bar. Zerger ulttyq sımvolıkaǵa toly, ári avangardtyq dızaın úlgilerine saı keletin ádetten tys buıym úlgilerin jasaıdy. Ózine ǵana tán erekshe talǵamǵa ıe Báshirov - halyq ıgiligin aıryqsha baǵalaı biledi, ishki tanymy boıynsha etnograf ol qazaqtardyń kóne áshekeılerin, kilemderin jáne basqa da turmystyq zattaryn jınap júrgen kollektsıoner.
S.Báshirov kóptegen festıvalder men kórmelerge qatysyp, joǵary nagradalarǵa ıe boldy. 1998 jyly Almaty qalasynda ótken jastardyń «Jiger» atty kórmesinde «Kórmeniń tańdaýly jumysy» dıplomymen marapattaldy. 1999 jyly sheberlerdiń Almaty qalasynda uıymdastyrylǵan «Zerger-99» baıqaýynda Bas júlde - «Asyl jambyny» ıelengen. Onyń týyndylary álemniń kóptegen elderinde ótken kórmelerde kelýshilerdiń júreginen oryn alǵan. 2005 jyly ol ıÝNESKO-nyń «Sapa belgisi» sertıfıkatyna ıe boldy.
Sonymen qatar ol shet elderdegi birqatar kórmelerge qatysqan. 2000 jyly Qyrǵyzstandaǵy «Beıbitshilik úshin» atty halyqaralyq festıvalge qatyssa, 2000-2001 jyldary Máskeýdegi Ortalyq sýretshiler úıinde Qazaqstan atynan ókildik etken. 2001 jyly Germanııanyń Magdebýrg qalasynda ótken «Gala-art» festıvaline qatysty. 2004 jyly Báshirov AQSh-tyń Arızona shtatyndaǵy Týsson qalasynda óz ónerin kórsetti. Sondaı-aq sheber Vengrııada eki márte bolyp qaıtqan. 2003 jyly Kechkemettegi qoldanbaly-sýretshilerdiń festıvaline, al ekinshi ret 2010 jyldyń tamyz aıynda Qazaqstannyń 64 adamnan turatyn delegatsııasynyń quramynda «Týran-2010» atty Úlken Quryltaıǵa qatysty, ol Býgats degen jerde ótken bolatyn. Frantsııa astanasy Parıjde 2007 jyly ótken Joǵary sán aptasynda oraldyq dızaıner Aqkenje Devıatko óz kollektsııasyn nazarǵa usynǵan. Al onyń úlgilerine Serjan Báshirovtiń zergerlik buıymdary sán bergen-di.
S.M.Báshirov 1964 jyly Shyǵys Qazaqstan oblysy Tarbaǵataı aýdanynyń Aqjar aýylynda dúnıege kelgen. Almatynyń Gogol atyndaǵy Memlekettik kórkemsýret ýchılışesin, al 1991 jyly Almaty Memlekettik teatr-kórkemóner ınstıtýtyn támamdaǵan. Respýblıkalyq kórkemsýret kolledjiniń oqytýshysy. Qazaqstan Sýretshiler odaǵynyń múshesi.
Atalǵan kórme maýsymnyń 9-nan shilde aıynyń 9-na deıin«Almaty» Art-Ortalyǵynda ótedi.
