Almatyda belgili sýretshi Rystan Ómirzaqtyń kórmesi ashyldy
ALMATY. 9 aqpan. QazAqparat /Áıgerim Ámir/ - Búgin QR Memlekettik ortalyq murajaıynda sýretshi Rystan Ómirzaqtyń «Atameken» atty kórmesi ashyldy. Onda sýretshi men onyń otbasy músheleriniń 60-tan astam týyndylary usynylǵan.
Rystan Ómirzaq - ulttyq qundylyqtarmen qatar eýropalyq bilimmen de sýsyndaǵan sýretshi. Onyń týyndylaryndaǵy órnekter ózindik mán-maǵynaǵa ıe erekshe dúnıe. Janrlyq turǵyda sýretshi stanokty keskinder men kestelerdi erkin ıgergen. Nátıjesinde avtordyń oıýlary «jańasha beınege» ıe boldy.
R.Ómirzaq - Pıkasso, Matıssa týyndylarynyń túpnusqalaryn zertteýdiń arqasynda, ózi de jazyq kenepke erekshe izdenister engizý múmkindigin mengergen óner ıesi. Ózindik qoltańbany tolyqtyrý úshin ol tektik belgiler retinde - tamǵa, taý tastaryna salynǵan sýretterdi paıdalanady. Týylǵanynan kórkemdikke jany jaqyn sýretshiniń talǵamy onyń jumystaryna ekzotıkalyq ásemdik beredi. Sonymen qatar, sýretshi ulttyq ónerdiń barlyq oıý-órnekter qoryn paıdalaný arqyly qazirgi kúnniń jańasha qııalı álemin túsindiredi.
Kórmege sýretshiniń jary Kálemhan Rahmetbaı, qyzdary Aınur men Gúlnazymnyń týyndylary da qoıylǵan. Kórmede sýretshiniń jary Kálemhan Rahmetbaımen birlesip salǵan sýretteri men kesteleri de ózindik sıpatqa ıe bolyp otyr. Olardyń bul birlese otyryp atqarǵan jumystary keleshekte sıntetıkalyq janrdyń beıneleý ónerine jańa damý úrdisin alyp kele jatyr deýge bolady. Qyzdary Aınur men Gúlnazda óner ıeleri. Gúlnaz - QR Memlekettik «Daryn» syılyǵynyń laýreaty, «Shabyt» baıqaýynyń altyn medalin alǵan. Aınur - kóptegen halyqaralyq baıqaýlardyń qatysýshysy. Onyń týyndylary Qazaqstannyń ǵana emes sonymen qatar Germanııa, Túrkııa elderindegi ystyq yqylasqa ıe bolǵan.
Kórme 14 aqpanǵa deıin jalǵasady.
