Almatyda belgili opera ánshileri tegin kontsert ótkizedi
ALMATY. QazAqparat - Almatyda 17-shi qańtarda oıyn-saýyq ortalyǵynda Abaı atyndaǵy Qazaq memlekettik akademııalyq opera jáne balet teatrynyń «Álemdik klassıka jaýharlary» atty tegin kontsert ótkiziledi.
Kontsert ótkiziletin «MEGA Alma-Ata» saýda oıyn-saýyq ortalyǵynyń baspasóz qyzmetiniń habarlaýynsha, baǵdarlamada álemdik jáne ulttyq klassıkanyń altyn qoryna engen kompozıtorlar: G. Donıtsettı, D.Pýchchını, F.Legar, I.Shtraýs, D. Rossını, S.Muhamedjanov jáne E.Brýsılovskııdiń opera jáne operettalarynan dýetter pen arııalar oryndalady.
Álemdik klassıka jaýharlaryn Abaı atyndaǵy Qazaq memlekettik akademııalyq opera jáne balet teatrynyń solısteri, Qazaqstan Respýblıkasynyń eńbek sińirgen qaıratkerleri: Dına Dútmaǵambetova, Bolat Jomartov, QR Memlekettik syılyǵynyń laýreaty Talǵat Kúzembaev, solıstter: Venera Alpysbaeva, Anastasııa Kojýharova, Torǵyn Smaılova, Dana Talaspekova, Ilona Ten, Halıd Nurálıev, Darhan Joldybaev, Bolat Qanaǵatov jáne Maqsat Maqulbekov án shyrqaıdy.
Kontserttiń avtory men fortepıano partııasy - QR eńbek sińirgen qaıratkeri Gúlnar Jidilova. Júrgizýshisi - Ekaterına Chentsova.
Aıta ketelik, «Álemdik klassıka jaýharlary» kontsertiniń baǵdarlamasynda E.Brýsılovskııdiń «Qyz Jibek», D.Verdıdiń «Rıgoletto», D.Rossınıdiń «Sevılıalyq shashtaraz», D.Pýchchınıdiń «Toska», J.Bızeniń «Karmen» jáne «Іnjý izdeýshi» operalary men F.Legardyń «Jaıdary jesir áıel» jáne I.Shtraýstyń «Jarqanat» operettalarynan dýetter men arııalar oryndaldy.
