Almatyda belgili qoǵam jáne saıası qaıratkeri Shárip Omarovtyń qurmetine arnalǵan kórme ashyldy
ALMATY. 23 qyrkúıek. QazAqparat /Názıra Eleýhan/ - Búgin Almatyda Qazaqstan Respýblıkasy Memlekettik ortalyq murajaıynda belgili qoǵam jáne saıası qaıratkeri, «Dos-Muqasan» ansambliniń negizin qalaýshy Shárip Omarovtyń (1948-2007) qurmetine arnalǵan «Jastyqtyń oty jalyndap...» atty jeke tulǵalyq kórmesi ashyldy.
Kórmege elimizdiń tarıhyndaǵy shoqtyǵy bıik tulǵalardyń biri - Shárip Omarovtyń ómiri men qyzmetin jáne shyǵarmashylyǵymen tanystyratyn zattar - fotosýretteri, ártúrli qujattary, resmı kostıýmderi men fýtbol formasy, doby, marapattary jáne taǵy da basqa kóptegen jeke zattary qoıylǵan. Murajaıǵa kelýshiler munda daryndy tulǵanyń ósken ortasy men salıhaly saıası qyzmet belesterimen jaqynyraq tanysa alady.
Shárip Omarov qoǵam jáne saıası qaıratker retinde QR Parlamenti Májilisiniń birneshe shaqyrylymdarynyń depýtaty, QR Jastar isi jónindegi memlekettik komıtet tóraǵasynyń birinshi orynbasary, Memlekettik «Qazaqstan» teleradıo kesheni tóraǵasynyń birinshi orynbasary, Almaty qalasy ákiminiń birinshi orynbasary, QR Parlamentiniń Qorǵanys jáne qaýipsizdik salasy boıynsha halyqaralyq isteri komıtetiniń tóraǵasy, EQYU Parlamenti Assambleıasynyń múshesi, TMD Elderi Parlamentaralyq Assambleıasynyń syrtqy saıası komıtetiniń tóraǵasy, QR-nyń Chehııa men Slovakııadaǵy Tótenshe jáne Ókiletti elshisi syndy joǵary laýazymdy memlekettik qyzmetterdi úlken jaýapkershilikpen atqarǵan. Sh. Omarovtyń óner jolyndaǵy shyǵarmashylyǵy stýdent kezinde ózi negizin qalaǵan aty áıgili «Dos-Muqasan» ansamblimen tikeleı baılanysty.
"Shárip Omarov ózi atqarǵan memlekettik jaýapty qyzmetterdiń qaısysynda bolmasyn Táýelsiz Qazaqstannyń damýy men gúldenýine zor úles qosa bildi. Ókinishke qaraı, mezgilsiz jetken qaza bul daryndy tulǵanyń áleýetin tolyq kórsetýge múmkindik bermedi",-dep aıtyldy kórmeniń ashylýynda.
Kórmeniń ashylý saltanatyna Qazaqstan Respýblıkasynyń belgili qoǵam jáne saıası qaıratkerleri men Shárip Omarovtyń januıa músheleri jáne jaqyn dostary qatysty.
Mýzeıdiń 4 zalynda ornalasqan atalmysh kórme qazannyń 23-ne deıin jalǵasady.
