Almatyda belgili ǵalym Marat Barmanqulovty eske aldy
ALMATY. Aqpannyń 12-si. QazAqparat /Erbol Azanbek/ - Búgin Almatydaǵy Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde Qazaqstandaǵy teleradıojýrnalıstıkanyń ǵylymı mektebiniń negizin qalaýshy, professor, fılologııa ǵylymynyń doktory Marat Barmanqulovqa arnalǵan «dóńgelek ústel» ótti,
dep habarlaıdy QazAqparat.
QazUÝ-dyń professory Saǵymbaı Qozybaevtyń aıtýynsha, Marat Barmanqulovty Qazaqstandaǵy jýrnalıstıka ǵylymynyń negizin qalaýshylardyń biri retinde qarastyrý kerek. «Elimizdegi telearna salasynyń qaýymy ony otandyq televıdenıeniń ókil ákesi retinde qaraýy beker emes. On shaqty jyldan beri aramyzda joq, biraq onyń beınesi bizdiń júregimizde», deıdi S.Qozybaev. Fakýltet dekany Ǵalııa Ibraevanyń aıtýynsha, Marat Barmanqulovtyń týǵan kúnine arnalǵan bundaı shara jyl saıyn ótkiziledi. «Bul otandyq jýrnalıstıkaǵa eleýli eńbek sińirgen qaıratker tulǵasyn aramyzda máńgi qaldyrý, eńbegi umytylmaýy úshin kerek», deıdi Ǵ.Ibraeva.
Marat Barmanqulov jýrnalıstıka fakýltetiniń dekany, teleradıojýrnalıstıka kafedrasynyń qurýshysy, 1972-2000 jyldar aralyǵynda meńgerýshisi boldy. Sondaı-aq orys tilindegi birneshe kitaptardyń avtory. «Dóńgelek ústel» barysynda «Barmanqulov aýmaǵynda» atty derekti fılm men televıdenıe salasyndaǵy stýdenttik jumystardyń kórsetilimi boldy. Sondaı-aq áriptesteri, jýrnalıster, ǵalymdar ol jaıly estelikterimen bólisti.
