Almatyda belgili ǵalym, abaıtanýshy Qaıym Muhamedhanovty eske aldy
ALMATY. 30 mamyr. QazAqparat /Erbol Azanbek/ - Búgin Almatyda saıası qýǵan-súrgin qurbandaryn eske alý kúnine oraı «Onyń taǵdyryna túrli memleketter alańdady» atty «dóńgelek ústel» ótti.
Onda kórnekti ǵalym, abaıtanýshy Qaıym Muhamedhanovtyń ómiri men eńbek joly, eńbekteri týraly keńinen áńgime boldy.
«Q.Muhamedhanov atyndaǵy Bilim jáne mádenıet ortalyǵy» qorynyń dırektory Dınara Muhamedhannyń aıtýynsha, búgingi shara tek Qaıym Muhamedhanovty ǵana emes, repressııa qurbandaryn da eske alýǵa arnaldy.
«Repressııa jyldarynda ulttyń qaımaqtary men zııalylary qurbandyq boldy. Biz sol qurbandar isin jalǵastyryp, olar armandaǵan demokratııalyq qoǵamdy joǵary qundylyqtar negizinde damytýymyz kerek. Repressııa - bizdiń tarıhymyzdyń qasiretti bóligi. Sondyqtan ony umytpaýymyz kerek»,- dedi ol.
Q.Muhamedhanov (1916-2004) - ǵalym, Abaıtanýdyń negizin salýshy, QSRO Jazýshylar odaǵynyń múshesi, Semeıdegi Abaı murajaıynyń negizin salýshy, 1945 jylǵy QazSSR-diń alǵashqy ánurany mátiniń avtory, Halyqaralyq Abaı akademııasynyń altyn medaliniń ıegeri, qoǵam qaıratkeri, aqyn, dramatýrg, aýdarmashy, aǵartýshy.
