Almatyda belgili fototilshi Qaırat Mustafınniń 80 jyldyǵyna arnalǵan fotokórme ashyldy

Qazaqstan Jazýshylar odaǵy, Almaty qalasy men Qaraǵandy oblysy ákimdiginiń jáne «Fotoóner» Qoǵamdyq birlestiginiń uıymdastyrýymen ashylǵan fotokórmege avtordyń 100-ge jýyq fotosýretteri qoıylǵan.

«Kórmeniń maqsaty - qoǵamdy qazaqstandyq fotojýrnalıstıkanyń negizin qalaýshylardyń biri bolyp tabylatyn Qaırattaı tanymal fototilshiniń shyǵarmashylyq murasymen tanystyrý bolyp tabylady», - deıdi sharanyń uıymdastyrýshylary. 

Fotokórme eki kezeńnen turady.  Birinshi kezeńde kórme 28 - 31 naýryz aralyǵynda  Qazaqstan Jazýshylar odaǵynyń ǵımaratynda ótedi. Kórmeniń ekinshi kezeńi aǵymdaǵy jyldyń 5 - 15 sáýir aralyǵynda  Qaırat Mustafınniń týǵan jeri - Qaraǵandy qalasyndaǵy oblystyq Beıneleý óneri murajaıynda jalǵasatyn bolady. 

Qaırat Mustafın qazaqtyń klassık jazýshysy Ǵabıden Mustafınniń uly. Azamattyq avıatsııanyń ushqyshtar mektebin aıaqtap, bort radısti mamandyǵyn alǵannan keıin Qaırat Mustafın fotojýrnalıstıka salasyna birjola bet burady. Ol uzaq jyldar boıy  aldyńǵy qazaqstandyq basylymdarda, onyń ishinde «Qazaq ádebıeti» gazetinde jáne Qazaq telegraf agenttiginde qyzmet etti. Ol jarty ǵasyrǵa jýyq kásibı jáne shyǵarmashylyq ómir jolynda fotoobektıvine ataqty óner jáne mádenıet qaıratkerlerin, eńbek jáne sport erlerin,  sol kezeńniń mádenı ómirindegi eleýli oqıǵalary men Qazaqstan tabıǵatynyń biregeı kadrlerin túsirip aldy. Qaırat Mustafın sondaı-aq Qazaqstan týraly ártúrli fotoalbomdar men kitaptardy  kórkemdik óńdeýge úlken úles qosqan adam. Zeınetke shyqqanǵa deıin «Óner» baspasynda qyzmet atqardy. Ol Búkilodaqtyq jáne Halyqaralyq fotokórmelerdiń laýreaty jáne dıplomanty bolyp tabylady. Qaırattyń alǵashqy fotosýretteri ótken ǵasyrdyń 50-shi jyldarynda qazaqstandyq basylymdarda jıi jarııalanyp turdy.