Almatyda bazarlardyń ornyna saýda úılerin turǵyzý jumystary jalǵasýda

Esterińizge sala keteıik, Almaty ákimi Ahmetjan Esimovtyń tapsyrmasy boıynsha qalada saýda alańdary retke keltirile bastady. Almaty qalasynyń aýmaǵynda 74 ámbebap bazar bar. Olardyń 34-i «qyzyl jıekten» shyǵyp ketken jáne oryndaryn aýystyrýdy qajet etedi, al qalǵan 40 bazar túgeldeı qaıta jaraqtandyrylýy tıis bolatyn.

Kazirgi kezde qala bıligi bazarlardyń basshylarymen júıeli jumystar júrgizýde, olardyń 6-aýy óz eskızderin usyndy. Onyń 3-eýi maquldanyp, jobalaý isi qolǵa alyndy. 13 bazardyń  basshysy óz nysandarynda tıisti jumysty júrgizip jatqandyqtaryn, kommýnıkatsııa máselelerin sheship, jobalaý jumystaryna kirisip ketkendikterin qujattar arqyly dáleldedi.

Keshe qala ákimi Ahmetjan Esimov tapsyrmalardyń qalaı oryndalyp jatqandyǵyn tekserý maqsatynda «ADK» atty jańa saýda oıyn- saýyq kesheninde boldy. Buryn munda bazar bolǵan edi.

Saýdaǵa qatysty zań boıynsha jańa saýda oryndaryn salǵan kezde parkıngter  basty nazarda bolýy tıis. Kommýnıkatsııa qurylysy, búgingi zamanǵa saı joǵary servıs jáne qazirgi kezde qajetti ózge de sharalar eskerilýi mańyzdy.  «ADK» saýda keshenin dál osyndaı  talapqa saı salynǵan saýda keshenderiniń biri dep aıtýǵa bolady. Oǵan kúnine 600 myńǵa deıin adam kele alady jáne munda 1000 avtomobılge arnalǵan parkıng bar. Saýda kesheniniń jalpy alańy - 45 myń sharshy metr. Onyń ishinde saýda býtıkteri, 6 zaldy kınoteatr, balalardyń oıyn-saýyq ortalyǵy, bank bólimsheleri,  700 orynǵa arnalǵan fýd-kort aımaǵy (4 meıramhana, 14 fast-fýd, 4 kofehana), sonymen qatar eki deńgeıli Wikiki, Sulpak dúkenderi ornalasqan. 14 myń sharshy metr aýmaqqa ornalasqan «A-Store» gıpermarketi de bar. Bul Orta Azııadaǵy eń iri saýda kesheni 40-tan astam taýar túrlerin usynady. Saýda oryn ashylǵaly beri munda 1500 jumys orny paıda boldy.