Almatyda Baýyrjan Momyshulynyń 100 jyldyǵyna arnalǵan memorıaldyq kórme ashyldy
ALMATY. 18 qarasha. QazAqparat /Erbol Turymbetov/ - Búgin Almatydaǵy QR Memlekettik ortalyq murajaıynda Keńes Odaǵynyń Batyry, aty ańyzǵa aınalǵan halyq qaharmany, jazýshy Baýyrjan Momyshulynyń týǵanyna 100 jyl tolýyna oraı «Aty ańyzǵa aınalǵan batyr» atty memorıaldyq kórme ashyldy.
Kórmeni QR Memlekettik ortalyq murajaıy QR Ortalyq memlekettik muraǵatymen birlese uıymdastyryp otyr. Onda batyrdyń 1961 jyly murajaıǵa óz qolymen tabystaǵan jeke zattary, batyrdyń ómiri jaıly muraǵattyq fotomaterıaldar, Elbasynyń batyrdyń uly Baqytjan Momyshulyna ákesiniń joǵary marapatyn tapsyrý rásimdik saltanatyn beıneleıtin fotosýretter jáne basqa da jádigerler qoıylǵan.
«Osy murajaıdyń «Qazaqstan UOS jyldarynda» ekspozıtsııalyq zalynda B. Momyshulynyń tutas jádigerler kesheni ornalastyrylǵan. Al búgingi kórmege sol jádigerlerin qoıyp otyrmyz. Munda tarıhı esteliktermen qatar, Báýkeńniń «Óner» baspasynan shyqqan 30 tomdyq shyǵarmalar jınaǵy da bar», - dedi murajaıdyń qordy esepke alý, saqtaý jáne qalpyna keltirý bólimsheleriniń jetekshisi Muhambetqalı Kıpıev.
Kórmeniń ashylý saltanatynda QR Qorǵanys mınıstrliginiń áskerı-tehnıkalyq mektebiniń kýrsanttary men №131 gımnazııa oqýshylary jazýshynyń eńbeginen úzindiler oqyp, kontserttik baǵdarlamalar oryndady. Sonymen birge, shara aıasynda murajaı pedagogtary Almaty qalasynyń jalpy bilim beretin mektepteriniń oqýshylary úshin «Halyqsyz batyr joq» atty murajaı sabaqtaryn ótkizýdi josparlap otyr.
Kórme jyl sońyna deıin jalǵasady.
