Almatyda Baýyrjan Momyshuly jaıly jańa derekti fılm túsirilip jatyr
ALMATY. Maýsymnyń 10-y. QazAqparat /Názıra Eleýhan/ - Almatyda belgili kınorejısser Qalıla Omarov Baýyrjan Momyshulynyń 100 jyldyq mereıtoıyna oraı, qazaqtyń batyr uly jaıly derekti fılm túsirip jatyr,
dep habarlaıdy QazAqparat.
«Derekti fılm «Qazaqtyń Baýyrjany» dep atalady. Fılm Mádenıet mınıstri Muhtar Qul-Muhammedtiń tikeleı qoldaýymen, Sháken Aımanov atyndaǵy «Qazaqfılm» kınostýdııasynda aqpan aıynan beri túsirilýde. Men kóbine qazaq tarıhyndaǵy aqtańdaqtar týraly túsiremin. Al, aqtańdaqtar eldiń, ulttyń tarıhynda ǵana emes, olardy quraıtyn jeke tulǵalardyń ómirine qatysty da jetip- artylady. Sol tulǵalardyń biri, kózi tirisinde eli úshin etken erlik isteri laıyqty baǵalanbaǵan qazaqtyń birtýar batyr uly - Baýyrjan Momyshuly. Sondyqtan, bul fılmde batyr atamyzdyń beınesin barynsha ashyp kórsetýge tyrysamyn, onyń ómirindegi belgisiz jaıttardy tereńirek zertteýge umtylýdamyn. Fılmdi jasaýda ǵylymı-zertteý ortalyqtarynyń ǵalymdarymen de áńgimelestim. Іzdenistiń arqasynda tyń derekterdi de taptym, ol fılmde aıtylatyn bolady. Qazirgi ýaqytta jumystar aıaqtalýǵa jaqyn», dedi fılmniń rejısseri Qalıla Omarov.
Onyń pikirinshe, fılm batyr Baýyrjannyń ańyzdan góri aqıqat taǵdyryn ashpaq.
Kınorejısser bul týyndysyna deıin, qazaq tarıhyna baılanysty «Alash týraly sóz», «Alashorda», «Atameken», «Zamana-sherý», «Baryp qaıt, balam, aýylǵa», «Maǵjan», «Uly jut» jáne taǵy da basqa birneshe ondaǵan derekti fılmderdi túsirgen.
