Almatyda baýyryn aýystyrǵan kelinshek dúnıege sábı ákeldi
ALMATY QazAqparat - Akýsherlik, gınekologııa jáne perınatologııa ǵylymı ortalyǵynda ekinshi márte baýyr aýystyrý boıynsha aýyr otadan keıin dúnıege deni saý sábı keldi, dep habarlaıdy QazAqparat tilshisi ortalyqtyń baspasóz qyzmetine silteme jasap.
Almaty oblysynyń turǵyny Tolqyn Aıdarova 2015 jyly Syzǵanov atyndaǵy Ulttyq hırýrgııa ortalyǵynda baýyr aýystyrý boıynsha jasalǵan sátti otadan keıin tuńǵyshyn dúnıege ákeldi. Kelinshek QR DSM-niń Akýsherlik, gınekologııa jáne perınatologııa ulttyq ortalyǵynyń bazasynda bosandy.
«Áıel tabıǵı jolmen dúnıege qyz balany ákeldi. Sábıdiń salmaǵy - 3 keli 250 gramm, boıy - 52 sm. Dárigerlerdiń aıtýynsha, ana men balanyń jaǵdaıy jaqsy»,- dedi ortalyqtaǵylar.
Aıaǵy aýyr kelinshek mekenjaı boıynsha akýsher-gınekologtan, gepatopankretobılıarlyq hırýrgtan tekseristen ótip, terapevtpen jáne gepatologpen keńesip otyrǵan.
2-shi akýsherlik bólimniń meńgerýshisi Batyr Óskinbaev balany kóterý kezinde týyndaýy múmkin qıyndyqtarǵa qaramastan transplantat júktilikti toqtatýǵa sebep bola almaıtynyn aıtty.
«Bizdiń tájirıbede qandaı da bir músheni aýystyrǵannan keıin júkti bolý - erekshe jaǵdaı emes. Sońǵy kezde organdaryn aýystyryp, keıin ana atanyp jatqan áıelderdiń sany artty. Alaıda baýyr aýystyrý boıynsha ótkizilgen aýyr otadan keıin dúnıege deni saý sábıdiń kelýi ekinshi ret bolyp turǵan jaǵdaı. Transplantologııanyń bul túri hırýrgııalyq turǵydan asa aýyr bolyp keledi. Alaıda bul júkti bolyp, dúnıege sap-saý balany ákelýge kedergi keltirgen joq. Árıne, mundaı qadamǵa barý batyldyq pen jaýapkershilikti talap etedi», - dedi dáriger.
