Almatyda baýkespeniń «jolyn baılaǵan» azamattar marapattalady
ALMATY. QazAqparat - Almatyda janarmaı quıý beketine shabýyl jasaǵan qaraqshyny qyzmetkerler qamap tastaǵan, dep habarlaıdy QazAqparat tilshisi.
Jetisý aýdandyq ІІB kezekshi bólimine túngi saǵat 2-ler shamasynda janarmaı quıý beketine shabýyl jasalǵany týraly habar túsken.
«26 jastaǵy J. esimdi azamat - Almaty oblysynyń týmasy. Ol aldymen janarmaı quıý beketin satyp alýshy retinde barlap shyqqan. Sálden soń medıtsınalyq maska kıip, qolyna pyshaq ustap, kirip kelgen. Keıinirek kúdikti pyshaqty káýapshydan urlap alǵanyn aıtty. Qaraqshyny kórgen kassırler dúkendi tastap, qyzmettik esikten shyǵyp, ony kilttep ketken. Dalada júrgen maı quıýshy jaǵdaıdy birden baıqap, álgini syrtynan bekitip, ǵımaratqa qamap tastaǵan. Іzinshe saqshylarǵa habarlasqan. Jol-patrýl polıtsııa ekıpajy oqıǵa bolǵan jerge dereý jetip, qylmyskerdi quryqtady»,-dedi Jetisý aýdany ІІB bastyǵynyń orynbasary polıtsııa polkovnıgi Darhan Musanov.
Kúdikti buǵan deıin birneshe ret múlik urlyǵy úshin jazaǵa tartylǵan. Bul joly da qylmysyn tolyqtaı moınyna aldy. QR Qylmystyq kodeksiniń 192-baby boıynsha sotqa deıingi tergeý amaldary júrip jatyr. Polıtsııa «Qamaýda ustaý» sharasyn belgilegen.
«Departament basshylary atalǵan janarmaı beketi qyzmetkerlerin tapqyrlyq kórsetip, shapshań áreket etkeni úshin marapattaý jaǵyn oılastyryp jatyr. Qyzmetkerler jeke basy men aınalasyna týǵan qaýipti seıiltip, baýkespeniń jolyn baılady. Bul - qurmetke ǵana emes, madaqtaýǵa laıyq is»,-dedi polkovnık Musanov.
