Almatyda Batyrhan Shúkenovtiń kópshilikke belgisiz ániniń tusaýy kesiledi
ALMATY. QazAqparat - Almatyda ótetin kontsertte Batyrhan Shúkenovtiń kózi tirisinde aıaqtaı almaı ketken áni tuǵysh ret shyrqalady, dep habarlaıdy «QazAqparat» HAA tilshisi.
«Mahabbatyń úshin rahmet» atty kontserttik baǵdarlama Batyrhandy eske alýǵa jáne onyń 55 jyldyq mereıtoıyn atap ótýge arnalady. Kontsertke Batyrdyń óner jolynda birge jumys istegen dostary, mýzykanttar kelmek. Keshtiń sharyqtaý sheginde sahnada Batyrdyń óz daýysy estiledi. Onyń buryn-sońdy eshkim estimegen jańa áni osy keshte shyrqalady», - dep aıtty «QazAqparat» HAA tilshisine Batyrhan Shúkenov atyndaǵy qoǵamdyq qordyń dırektory Oljas Baıqanov.
«Batyr Daler Nazarovtyń albomymen ózi jeke jumys istedi jáne Valerıı Meladzeniń birqatar ánderiniń jazylýyna qatysty. Álemniń túpkir-túpkirinen - Frantsııa men AQSh-tan jınalǵan djaz-rok baǵytyndaǵy top bolady. Barshańyz biletindeı, Batyrhan Shúkenov tek ánshi emes, sondaı-aq saksofonshy retinde birneshe ret djem-seıshnde óner kórsetken. Ókinishke oraı, osy kontsertke «A'Stýdıo» toby kele almaıtyn boldy», - dedi O. Baıqanov.
Qoǵamdyq qor basshysynyń sózine qaraǵanda, kontsert bıletteri satylymdarynan túsken qarjyǵa «Mahabbatyń úshin rahmet» atty jańa albom shyǵarylmaqshy. Ánniń avtorlarymen kelisim jasalǵan. Onyń tusaýkeseri kúzge josparlanǵan.
Batyrhan Shúkenovtyń mereıtoıyna arnalǵan «Mahabbatyń úshin rahmet» kontsertiniń rejısseri - Álisher Súleımenov. Eske alý keshin Saǵnaı Abdýllın men Janar Duǵalova júrgizedi.
