Almatyda Batyrhan Shúkenov atyndaǵy mýzykalyq baıqaý ótedi
ALMATY. QazAqparat - Batyrhan Shúkenov atyndaǵy alǵashqy mýzyka baıqaýy Almatyda ótedi, dep habarlaıdy QazAqparat tilshisi.
Qazaqstanda alǵash ret Batyrhan Shúkenov atyndaǵy respýblıkalyq mýzyka baıqaýy ótedi. Baıqaý 26-30 qarasha kúnderi sybyzǵy, goboı, klarnet, fagot jáne saksofon baǵyttarynda ótedi. Ony Batyrhan Shúkenov atyndaǵy Qor Bolat Ótemuratov qorynyń qoldaýymen uıymdastyryp jatyr.
Jeńimpazdardyń esimi 30 qarashada belgili bolady. Árbir atalymda 1, 2 jáne 3-oryndardy ıelengen ónerpazdarǵa syılyqtar, dıplomdar jáne qatysýshy dıplomy berilip, «Úzdik kontsertmeıster» anyqtalady. Baıqaýdyń jalpy júlde qory 5 mln teńgeden asady.
Qazylar alqasynyń quramy: «Jańa Eýropa» orkestriniń bas dırıjeri ári kórkemdik jetekshisi Nıkolas Kraýze (Frantsııa), saksofonshy ári kompozıtor Krıstıan Elın (Germanııa), fleıtashy, P.I. Chaıkovskıı atyndaǵy Úlken sımfonııalyq orkestrdiń solısi Nıkolaı Popov (Rossııa), Astana qalasy ákimdiginiń Memlekettik akademııalyq fılarmonııasynyń úrmeli aspaptar orkestriniń bas dırıjeri, QR Eńbek sińirgen qaıratkeri Ákim Muhatjanov, Qurmanǵazy atyndaǵy Qazaq ulttyq konservatorııasynyń goboı synybynyń professory Tańatar Nuraly jáne Qurmanǵazy atyndaǵy Qazaq ulttyq konservatorııasynyń klarnet synybynyń professory Janat Ermanov.
Mýzykanttardy irikteý onlaın júrgizildi. Oǵan 43 adam ótinish tapsyryp, ekinshi týrǵa 28 qatysýshy qabyldandy.
Baıqaý tórt kúnge sozylady. Baıqaýdan tys, baǵdarlamada kontserttik ashylý jáne jabylý saltanattary da bar. 27-28 kúnderi ekinshi týrda qatysýshylar solo jáne ansambl quramynda (kvartet/kvıntet) óner kórsetedi. Bul kezeńniń mindetti sharttarynyń biri - qazaqstandyq kompozıtordyń shyǵarmasyn oryndaý.
Fınalda qatysýshylar «Qazaqstan kameratasy» jáne Nıkolas Kraýze súıemeldeýimen Motsart nemese Glazýnov kontsertin oınaıdy.
