Almatyda basyna oq tıgen adam aman qaldy
ALMATY. QazAqparat - Almatyda dárigerler basyna oq tıgen adamdy qutqaryp qaldy. № 4 qalalyq klınıkalyq aýrýhananyń neırohırýrgtary kúrdeli operatsııa jasap, naýqastyń bas súıeginen oq alyp shyqty, dep habarlaıdy QazAqparat tilshisi.
16 shildede №4 aýrýhananyń qabyldaý bólimine sol jaq mańdaı samaı aımaǵynan qan ketken 38 jastaǵy adam tústi.
Onyń basy aınalyp, sol kóziniń kórý qabileti tómendegen.
«Basy ashyq jaralanǵan. Bas súıekten bireý oq atqan. Mı aýyr soqqy alǵan. Epıdýraldy gematoma paıda bolǵan. Mańdaı-samaı bólikterinen bógde dene (oqtyń) tabyldy. Mańdaı jáne samaı súıekteri fragmenttik túrde synǵan. Bas súıeginiń rentgenogrammasy 2 proektsııasynda qaraqus-samaı aımaǵynda qara súıek synyp, metaldan jasalǵan bógde deneniń tabylǵany rastaldy. Sonymen qatar, mıynyń parenhımasy zaqymdanǵan»,- dedi Almaty qalasy №4 Qalalyq klınıkalyq aýrýhananyń neırohırýrgi Tımýr Aıtmuhanov.
Jaradan qan ketý saldarynan er adam shuǵyl túrde anestezııa, reanımatsııa jáne qarqyndy terapııa bólimshesine emdeýge jatqyzyldy.
Operatsııa 2 saǵat 50 mınýtqa sozyldy. Bas súıekten oqty alyp tastaý kúrdeli jumys bolǵandyqtan, neırohırýrgtar mıdyń zaqymdaný qaýpin jáne onyń mańyzdy fýnktsııalaryn eskerdi. Dárigerler operatsııadan keıin aǵzanyń barlyq organdary men júıeleriniń jumysyn barynsha qalpyna keltirýge mindettelgen bolatyn. Operatsııa sátti ótti, patsıent esin jınady.
Operatsııany operator-dáriger Tımýr Muratuly Aıtmuhanov, assıstent Baýyrjan Asqaruly Bekbaev, anestezıolog Asqar Kóktaluly Sandybaev, operatsııalyq meıirbıke Rashıda Imanjanovna Týrdahýnova jasady.
