Almatyda bastaýysh synyptyń barlyq oqýshysy tegin tamaqtanady

ALMATY. QazAqparat – Jańa oqý jylynda Almatyda birinshi synypqa 31 myńnan astam bala bardy. Qala mektepterinde barlyǵy 317 myń oqýshy bilim alady, dep habarlaıdy QazAqparat tilshisi.

«Jańa oqý jylynan bastap memlekettik mektepterdiń 1-4 synyp oqýshylary tegin tamaqpen qamtamasyz etiledi. Bul maqsatqa jergilikti bıýdjetten jyl sońyna deıin 5,3 mlrd teńge bólindi», - dep habarlady qalalyq ákimdikten.

Sonymen qatar, oqýlyqtar men kórkem ádebıet satyp alýǵa jergilikti bıýdjetten 3 mlrd 263 mln 457 myń teńge bólindi.

«Bıyl 2-synyp oqýshylary jańa oqýlyqtar alady. 1-11 synyp oqýshylary da tegin oqýlyqtarpen tolyq qamtamasyz etiledi», - dep atap ótti ákimdikten.

Sondaı-aq, megapolıste úsh aýysymdy mektep máselesi sheshildi. Osy oqý jylynan bastap Almatydaǵy mektepter tolyqtaı bir nemese eki aýysymmen bilim berýge kóshedi. «Mádenıet» shaǵyn aýdanynda 1 500 oryndyq mekteptiń ashylýy qaladaǵy jalǵyz úsh aýysymdy mektep máselesin sheshýge múmkindik berdi.

№191, №146, №125 mektepterge japsarjaı salý arqyly oqýshylar sany 875 orynǵa kóbeıdi. Jyl sońyna deıin 5 memlekettik jáne 2 jekemenshik mektepti paıdalanýǵa berý, sonymen qatar qazirgi qoldanystaǵy oqý oryndaryna úsh qosymsha japsarjaıdyń qurylysyn aıaqtaý josparǵa engen.

Buǵan deıin Almatyda 8 jańa mektep ashylǵany týraly jazǵan bolatynbyz.