Almatyda «Bastaý» VIII halyqaralyq kınofestıvali bastaldy
ALMATY. QazAqparat – Almatyda stýdenttik jáne debıýttik fılmderdiń «Bastaý» VІІІ halyqaralyq festıvali bastaldy. Baıqaý barysynda qatysýshylar óz týyndylaryn tanystyryp, kásibı kınomatograftar sheberlik-sabaqtar ótkizedi, dep habarlaıdy QazAqparat tilshisi.
Jyl saıyn ótetin bul shara halyqaralyq ári kásibı baılanystardy nyǵaıtý men keńeıtýge, kıno salasyndaǵy jas talanttardyń maıtalman sheberlermen pikir almasýyna múmkindik beretin alańǵa aınalyp otyr.
Bıyl festıvaldiń resmı baǵdarlamasy keńeıip, ol halyqaralyq eki baıqaýdan turady bolady:
Bastau shorts – Eýropa jáne alys-jaqyn shetel stýdentteri keıingi 2 jylda túsirgen qysqametrajdy kórkem, anımatsııalyq jáne derekti fılmderdiń halyqaralyq konkýrsy;
Bastau debuts– Eýropa jáne alys-jaqyn shetelde keıingi 2 jylda túsirilgen tolyqmetrajdy debıýttik kórkem fılmderdiń halyqaralyq konkýrsy.
«Bizdiń festıvalimiz shyǵarmashyl jastarǵa bastaý bolatyn, tájirıbe almasýǵa jáne jas kınogerlerge óz jobalaryn keńinen nasıhattaý úshin yntymaqstastyqqa jol ashatyn kásibı alań. Festıvaldiń basty ereksheligi - bul shyǵarmashylyq erkindik. Onyń tynys-yrǵaǵyn qatysýshy jas býyn ózi aıqyndaıdy. Sondyqtan da festıvaldiń uranyn «Jańa býyn kınosy» dep aldyq. Festıvaldiń arqasynda biz qazaq rejıssýrasynda jańa tolqynnyń paıda bolýyna kýá bolamyz» - dedi «Bastaý» kınofestıvaliniń prezıdenti Sergeı Ázimov.
Bastau debuts - tolyqmetrajdy fılmderdiń halyqaralyq baıqaýyna 10 kartına tańdalyp alyndy. Olardyń qatarynda túrli halyqaralyq baıqaýlarda top jaryp, oq boıy alǵa shyǵyp júrgen «Avrora» (Qyrǵyzstan), Berlın kınofestıvaline qatysqan «Olardy kórgen sońǵy adam» (Germanııa), Úndistan men Qytaıdyń birlesip túsirgen «Aýyrsyný» fılmi, «Beıitterdi jyljytý» kınolentasy (Koreı), álemdik jetekshi kınofestıvalder laýreaty - «Márıam» (Qazaqstan) jáne basqa da kartınalar bar.
Bul konkýrsqa belgili reseılik rejısser, stsenarıst ári prodıýser Mıhaıl Segal jetekshilik etetin halyqaralyq qazylar alqasy baǵa beredi. Ádil qazylar quramynda: ıspandyq kınosynshy, kınofestıvaldiń San-Sebastıandaǵy irikteý komıtetiniń múshesi Roberto Kýeto, frantsııalyq prodıýser ári dıstrıbıýter Denıs Vaslın, reseılik teatr jáne kıno aktrısasy Nellı Ývarova, qazaqstandyq tanymal akter ári prodıýser Farhat Ábdiraıymov. Sondaı-aq festıval barysynda stýdenttik qazylar alqasy da jumys isteıdi. Bıyl onyń quramyna Qazaqstan, Armenııa, Belarýs, Reseı, Qyrǵyzstan ókilderi kirip otyr.
Bastau shorts - qysqametrajdy fılmder baıqaýyna qatysý úshin bıyl álemniń 44 elinen 360 ótinim kelip túsken. Mundaı rekordtyq kórsetkish festıvalǵa degen qyzyǵýshylyq pen onyń halyqaralyq bedeliniń arta túskenin aıǵaqtaıdy. Tizimdi Reseı bastap tur, bul elden 60 fılm joldanǵan.
Bul baǵdarlamaǵa Qazaqstan 6 kartına usyndy: Kamılla Berdimuratovanyń «Taqsyr» derekti fılmi, Aıdarbek Ábdilqadyrdyń «Tereń sý» anımatsııalyq týyndysy, Samǵar Raqymnyń «Dıplommen aýylǵa» fılmi, Elaman Shaýbanovtyń «Baýyr» kartınasy, Darına Manapovanyń «Máýlen» dramasy jáne Baǵlan Qudaıberlıevtiń «Tynyshtyq baıany» fılmi.
Qysqametrajdy fılmderge qazylyq etetin alqanyń tóraǵasy frantsııalyq rejısser, stsenarıst, Sanders bedeldi kınofestıvaliniń eki márte jeńimpazy, Venetsııa kınofestıvaliniń júldegeri Gela Bablýanı. Sondaı-aq qazylar alqasynyń quramynda Ózbekstannyń eńbek sińirgen artısi Rano Shodıeva, «Lıstopad» HKF baǵdarlamalyq dırektory Igor Sýkmanov, reseılik teatr jáne kıno akteri Aleksandr Pashkov, qazaqstandyq rejısser Shárıpa Orazbaevalar bar.
Qazylar alqasy men qonaqtary ótkizetin sheberlik dárister, shyǵarmashylyq kezdesýler kezinde stýdentter kıno salasyna qatysty qyzyqtyratyn suraqtaryna jaýap ala alady.
Festıval baǵdarlamasynyń mańyzdy bóliginiń biri - halyqaralyq kınomektepter qaýymdastyǵynyń quramyna jańa múshelerdi qabyldaý týraly memorandýmǵa qol qoıý bolmaq.
Halyqaralyq baıqaý búgin saǵat 19:00-de «Alataý» dástúrli óner teatrynda rejısser Sharıpa Orazbaevanyń «Márıam» fılmimen ashylady.
Qala turǵyndary men qonaqtary túrli janrdaǵy 80-ge jýyq kınony Bekmambetov Cinema (Abaı dańǵ.109 V, Globus HKF, 2-shi qabat) kınoteatrynda tegin tamashalaı alady.
Jeńimpazdardyń esimderi 2019 jyldyń 7 jeltoqsanynda ótetin marapattaý saltanatynda jarııalanady.
«Bastaý» stýdenttik jáne debıýttik fılmderdiń halyqaralyq festıvali Almaty qalasy ákimdiginiń, T.Q.Júrgenov atyndaǵy Qazaq ulttyq óner akademııasynyń, Tanaris Production kompanııasynyń, «Turan» ýnıversıteti jáne Sh.Aımanov atyndaǵy «Qazaqfılm» kınostýdııasynyń qoldaýymen uıymdastyryldy.
