Almatyda «Bastaý bıznes» baǵdarlamasy boıynsha oqýǵa 2 myńnan astam adam jiberildi
ALMATY. QazAqparat - Almatyda óńirlik kommýnıkatsııalar qyzmeti alańynda ótken brıfıng barysynda Almaty qalasy Kásipkerler palatasynyń dırektory Aıtýar Qoshmambetov bıznesti qoldaý jumysynyń qorytyndysy men aldaǵy jylǵa arnalǵan jumys jospary týraly aıtyp berdi, dep habarlaıdy QazAqparat tilshisi.
Onyń aıtýynsha, 2020 jyldyń basynan bastap, búginge deıin 5 753 kelýshige 7 446 qyzmet kórsetildi. «Bıznes-mektep» jobasy boıynsha 1 412 tyńdaýshy onlaın kýrs oqyǵan.
«Al «Іskerlik baılanystar» quralynyń mindeti halyqaralyq jáne sheteldik uıymdardyń qoldaýymen sheteldik áriptestermen iskerlik baılanystar ornatý. Baǵdarlamanyń 2-kezeńi 2021 jyly 4 mindetti iske asyratyn bolady. Sonymen qatar, «Aǵa senorlar» komponenti boıynsha 2 mindet ótkizildi. Bıyl 73 ındýstrııalyq sertıfıkat, 453 «CT-KZ» sertıfıkaty jáne 5879 taýardyń eksportqa shyǵý sertıfıkaty berildi«,- dedi A.Qoshmambetov.
«Bastaý Bıznes» jobasy aıasynda 2 600 adam oqýdy aıaqtady. 2 128 tyńdaýshy aıaqtalǵany týraly sertıfıkat aldy, al 472 tyńdaýshy qatysqany týraly sertıfıkat aldy. 2020 jylǵa Almaty qalasyna 1 705 grant bólindi, onyń ishinde 818 grantty 2019 jylǵy «Bastaý Bıznes» túlekteri aldy.
687 grantty 2020 jyly oqýdy aıaqtaǵan qatysýshylar ıelendi. Búgingi tańda 2020 jyldyń 1 334 túlegi óz bıznesin bastady.
«Eńbek» Nátıjeli jumyspen qamtýdy jáne jappaı kásipkerlikti damytý baǵdarlamasy sheńberinde «Atameken» UKP-nyń Bilim berý uıymdarynyń tizimine 6 oqý ortalyǵy engizildi.
Bıyl shilde aıynan bastap 1005 jumyssyz jáne ózin-ózi jumyspen qamtyǵan (oqytý jospary 1000) qysqa merzimdi kásiptik oqýmen qamtyldy.
«Almaty qalasynda dýaldy bilim berý júıesimen 42 kolledj jáne 351 kásiporyn qamtylǵan. Osyǵan baılanysty, 4389 úshjaqty shart jasaldy. Kásipkerlik negizderi jobasyn iske asyrý sheńberinde Almaty qalasy boıynsha tehnıkalyq jáne kásiptik bilim berý uıymdarynyń 3,5 myń stýdenti «Kásipkerlik qyzmet negizder» páni boıynsha úsh aılyq 36 saǵattyq fakýltatıvtik oqytý kýrsynan ótti. Oqytý 2019-2020 jyldary biliktilikti arttyrý kýrstarynan ótken 43 sertıfıkattalǵan oqytýshyny tarta otyryp, sondaı-aq, 20 memlekettik kolledjdi qamtı otyryp, onlaın rejımde ótti«, - dedi palata basshysy. Esepti kezeńde 54 adamnan turatyn 12 mobıldi jumyspen qamtý ortalyǵy 81 086 qyzmet kórsetti.
Onyń ishinde 76 111 adamǵa keńes berilip, «Bastaý bıznes» baǵdarlamasy boıynsha oqýǵa 2 085 adam jiberildi. Jumysqa ornalasýǵa 3 396 adam jiberildi.
Sonymen qatar ol Kásipkerler palatasynyń taıaý ýaqytqa arnalǵan miedetterin atap ótti. Buǵan pandemııadan keıingi Prezıdenttiń joldaýyn eskere otyryp ázirlengen segiz baǵyt: nólden bastap retteý, salyq kodeksin jetildirý, aqsha-nesıe saıasatyn yntalandyrý, ekonomıkany memleket ıeliginen alý, oryndy protektsıonızm, agroónerkásiptik keshendi damytý, óńirlik damý baǵdarlamalary jáne kadrlar daıarlaý kiredi.
