Almatyda bastalǵan halyqaralyq ǵylymı forýmda júıke aýrýlaryn emdeý tásilderi talqylanýda
ALMATY. QazAqparat - Búgin Almatyda «Qazaqstanda nevrologııa boıynsha bilimderdi jańǵyrtý» taqyryby boıynsha Halyqaralyq bilim berý ǵylymı forýmy bastaldy. Oǵan jaqyn jáne alys shet elderden 500-ge jýyq delegat qatysýda.
«Búgingi medıtsınalyq ǵylymı forým mundaı keń kólemde TMD aýmaǵynda tuńǵysh ret uıymdastyrylyp otyr. Oǵan akademııalyq reıtıngi boıynsha álemdegi eń úzdik 200 ýnıversıtettiń qataryna kiretin medıtsınalyq joǵary oqý oryndarynyń professorlary, sondaı-aq, elimizdiń óńirleri men alys jáne jaqyn shet elderden nevrolog dárigerler, terapevter, neırohırýrgtar, reanımatologtar jáne jalpy praktıkalyq dárigerler keldi. Barlyǵy shamamen 500-ge jýyq delegat qatysyp otyr. Búgingi sharanyń basty maqsaty aty aıtyp turǵandaı, nevrologııa salasyndaǵy bilimdi jańǵyrtý, ózara tájirıbe almasý jáne osy salada jetken jetistiktermen jete tanysyp, ózekti máselelerdi jan-jaqty talqylaý. Insýlt, shashyrańqy skleroz, Parkınson derti, dementsııa sekildi aýrýlardyń utymdy emdeý joldaryn izdestirý», - dedi óz sózinde S. Asfendııarov atyndaǵy Qazaq ulttyq medıtsınalyq ýnıversıtetiniń ǵylymı qyzmetkeri, Qazaqstan nevrologtarynyń «Neurosciences» ulttyq qaýymdastyǵynyń deparatment bastyǵy Aıda Końdybaeva.
Aıta ketelik, búgingi sharaǵa Búkilálemdik nevrologtar federatsııasy, Azııa jáne Okeanııa qaýymdastyǵy jáne Eýropa nevrologtary akademııasy qoldaý kórsetip otyr.
Forým barysynda ǵylymı baıandamalar oqylyp, talqylaýlar júrgiziledi jáne sheberlik synyptary ótkiziledi.
Ǵylymı forým 8-shi qyrkúıekke deıin jalǵasady.
