Almatyda «Baspa men kitap saýdasy arasyndaǵy is-qımyl» atty konferentsııa ótip jatyr
ALMATY. Tamyzdyń 25-i. QazAqparat /Ádilet Musahaev/ - Atalmysh shara Almatydaǵy Gete-ınstıtýtynyń baspa qyzmetkerleriniń biliktiligin arttyrýǵa arnalǵan jobasy aıasynda ótip jatyr, dep habarlaıdy QazAqparat.
Gete-ınstıtýtynyń kitaphana bóliminiń meńgerýshisi Sholpan Qyzaıbaeva atalmysh jobanyń 2009-2011 jyldarǵa josparlanǵandyǵyn jáne Qazaqstanmen Qyrǵyzstandy qamtıtyndyǵyn aıtady.
«Bul jobanyń negizgi maqsaty Shyǵys Eýropa elderimen Ortalyq Azııadaǵy kitap saýdasy jáne baspa isimen aınalysatyn adamdarǵa kásibı qoldaý kórsetý bolyp tabylady», deıdi Sh.Qyzaıbaeva.
Búgingi shara barysynda Qyrǵyzstan, Ózbekstan jáne Qazaqstannyń baspa mamandaryna Germanııadan kelgen sarapshylar «Demeýshilik pen seriktestik», «Avtorlyq quqyq pen lıtsenzııa», «Baspasózben birlese jumys isteý» jáne «Kitaptyń bezendirilýi men dızaıny» atty taqyryptarda baıandamalar oqyp, talqylaıtyn bolady
Sh.Qyzaıbaeva buǵan deıin de baspa isimen aınalysatyn mamandar arasynda semınarlar men kezdesýler ótkizip, olardyń bilimin jetildirýge tyrysqandyqtaryn jetkizdi. «Germanııadaǵy Frankfýrt qalasynda da ótken semınar men kitap jármeńkesine elimizdiń mamandary qatysýǵa joldama alyp, tájirıbe almasyp keldi», dep atap ótti Sholpan Qyzaıbaeva.
Sondaı-aq ol elimizdegi kitap isi 1990 jyldary quldyraýǵa túskenimen qazirgi kezde bul sala alǵa qoıylyp, baspalarymyz óz betinshe damyp jatqandyǵyn aıtyp ótti.
