Almatyda basketboldan mektep komandalary arasynda birinshilik bastaldy

«Qazyna kapıtal menedjment» kompanııasynyń qoldaýymen jáne Qazaqstan ulttyq basketbol federatsııasynyń uıymdastyrýymen bastalǵan «Mektep lıgasy» birinshiligine 30 mektepten 420 jas sportshy qatysady. Jarys barysynda 270 oıyn ótkizý josparlanýda.

Uıymdastyrýshylardyń aıtýynsha, joba 2012 jyldyń mamyr aıynyń sońyna deıin jalǵasady. Sporttyq sharanyń negizgi maqsaty - balalar men jasóspirimder arasynda basketbol sport túrin nasıhattaý, jastardy turaqty túrde dene shynyqtyrýmen aınalysýǵa tartý, oqýshylardyń densaýlyqtaryn arttyrý men jas sportshylardyń sheberligin shyńdaý bolyp tabylady.

Birinshiliktiń resmı ashylýyna «Astana» basketbol klýbynyń bas dırektory Valerıı Tıhonenko arnaıy qatysty. «Men Almaty qalasynyń basketbol mektebinde oqı júre, Keńes Odaǵynyń qurama komandasyna kirip, olımpıadalyq medalǵa ıe boldym, sondyqtan úlken jetistikke jetý ol múmkin nárse. Sondyqtan árqaısysyń osyndaı armanǵa jete alasyńdar»,-dedi V. Tıhonenko. Ol sondaı-aq, ashylý saltanatynda balalar sportyn qoldaýdyń mańyzdylyǵyn atap ótip, Mektep lıgasynyń barlyq jas sportshylaryna basketbol alańdarynda tabysqa jetýlerin tiledi.

«Qazyna kapıtal menedjment» basqarmasynyń tóraǵasy Abaı Alpamysov quttyqtaý sózinde jańa maýsymda mektep komandalary sanynyń kóbeıgenin atap ótti. «Bizdiń kompanııa osymen ekinshi jyl Ulttyq basketbol federatsııasynyń mektep jarystaryn uıymdastyrýyn qoldap keledi. Osyndaı áleýmettik jobalardy respýblıkanyń barlyq aýmaqtarynda jalǵastyrý jáne damytý qajet» - dedi ol.

«Ótken jyly ótkizilgen jarystar bul jobanyń ózektiligin jáne jattyqtyrýshylardy (dene shynyqtyrý muǵalimderin) oqytýdy uıymdastyrý qajettigin kórsetti. Biz, jergilikti jáne sheteldik mamandardy tarta otyryp, mektep jattyqtyrýshylary men komandalaryna arnalǵan 10-nan asa semınarlardy ótkizýdi josparlap otyrmyz» -dedi «Mektep lıgasy» jobasynyń uıymdastyrýshy Jomart Ásenqanov.