Almatyda bas jaraqatymen orta eseppen kúnine 15-20 naýqas aýrýhanaǵa túsedi

ALMATY. QazAqparat - 20 naýryz – Dúnıejúzilik bas jaraqaty týraly aqparattandyrý kúni. Atalmysh kúnge oraı, bas jaraqattary týraly tolyǵyraq Almaty qalalyq jedel shuǵyl kómek kórsetý aýrýhanasy qabyldaý bóliminiń meńgerýshisi Baýyrjan Omarov aıtyp berdi, dep habarlaıdy QazAqparat tilshisi.

«Bas jaraqaty – mıdyń, bas súıeginiń nemese bas terisiniń kez kelgen zaqymdanýy bolyp tabylady. Ol jeńil soqqydan nemese kógerýden mıdyń jaraqatyna deıin bolýy múmkin. Bas jaraqattaryna mıdyń shaıqalýy, bas súıeginiń synýy jáne bas terisiniń jaraqattary jatady. Basyńyzdyń zaqymdanýyna ne sebep bolǵanyna jáne onyń aýyrlyǵyna baılanysty saldary men emi ár túrli bolady»,- dedi dáriger.

Onyń aıtýynsha, bas jaraqattary jabyq nemese ashyq bolýy múmkin.

«Ashyq jaraqat degenimiz – bul bastyń jumsaq tini, ulpalarynyń tutastyǵynyń buzylýy, súıektiń ashyq synýy jáne mıdyń qatty qabyǵynyń zaqymdanýy. Jabyq bas-mı jaraqaty – teri jamylǵylary men kilegeıli qabyqtyń tutastyǵy buzylmaı zaqymdaný. Bas súıektiń zaqymdanýyn qanshalyqty aýyr ekenin baǵalaý qıyn. Bastyń keıbir jeńil jaraqattary kezinde kóp qan ketedi, al keıbir aýyr jaraqattarda múlde qan ketpeıdi. Bas súıeginiń barlyq jaraqattaryn baıypty túrde emdeý jáne olardy dárigerdiń baǵalaýy mańyzdy»,- dedi Baýyrjan Omarov.

Aýrýhananyń qabyldaý bólimine kúnine orta eseppen bas jaraqatymen 15-20 naýqas túsedi.

«Onyń 70 paıyzyn jedel járdem ákeledi. Olardyń ishinde 4-6 naýqas aýrýhanaǵa jatqyzylady, negizinen neırohırýrgııa bólimshesine»,- dedi dáriger.

Sóz sońynda Baýyrjan Omarov bas jaraqatyna jeńil-jelpi qaramaý kerektigin aıtty.

«Eger bas jaraqaty bolsa, ásirese, esin joǵaltý, qusý jáne bas aınalý sııaqty belgiler bolsa, dereý jedel járdem qyzmetine habarlasyńyz nemese jaqyn jerdegi jedel járdem bólimine júginińiz»,- dedi ol.