Almatyda «Barys» xokkeı klýbynyń oıyndary ótedi - resmı málimdeme
NUR-SULTAN. QazAqparat - «Barys» xokkeı klýbynyń basshylyǵy bıyl birneshe oıyndy Almaty qalasynda ótkizetinin málimdedi, dep xabarlaıdy QazAqparat tilshisi.
Klýb prezıdenti Borıs Ivanışevtiń aıtýynsha, bıyl qyrkúıek aıynda «Barys-Arenada» birqatar mádenı sharalar ótedi. Sol sebepti osy aıda klýb oıyndaryn Almatyda ótkizý týraly sheshim qabyldandy. 
«Qurlyqtyq xokkeı lıgasynyń kúntizbesi áli shyqqan joq. Degenmen, biz «Barystyń» úıdegi matchtaryn shamamen qyrkúıekte Almatyda ótkizýdi josparlap otyrmyz. Ókinishke qaraı, lıganyń kúntizbesi áli daıyn emes. Sol sebepti naqty kúnderin aıta almaımyz. Biraq Qurlyqtyq xokkeı lıgasynyń bıylǵy matchtary Almatyda ótedi. Ony anyq aıta alamyz. Bul - naqty aqparat», - dedi B.Ivanışev Astanada ótken baspasóz máslıxatynda.
Aıta keteıik, búgingi brıfıngte klýb basshylyǵy aldaǵy Álem chempıonatyna daıyndyq jumystary týraly aıtyp berdi. 25 sáýirde Astanadaǵy «Barys-Arenada» A tobyna kiretin erler komandalary arasyndaǵy I dıvızıon boıynsha Álem chempıonaty ótedi.
Qazaqstan quramasy atalǵan básekege daıyndyq sharalaryn bastady. Ulttyq quramanyń bas bapkeri Andreı Skabelkanyń aıtýynsha, komandanyń keńeıtilgen tiziminde Talǵat Jaılaýov ta bar. Al Qazaqstan azamattyǵyn alǵan kanadalyq Naıdjel Doýs chempıonatqa qatysýdan bas tartty.
