Almatyda bankterdiń birine qaraqshylyq shabýyl jasaldy

ALMATY. QazAqparat – Almatyda bank bólimshesine shabýyl jasaldy, dep habarlaıdy QazAqparat tilshisi.

Almaty qalalyq Polıtsııa departamentiniń habarlaýynsha, oqıǵa 15 qazan kúni bolǵan.

«Almatyda qarýlanǵan eki qaraqshy Kaspi.kz fılıalyna shabýyl jasady. Jumys kúni aıaqtalýǵa jaqyn qalǵandyqtan, bank bólimshesinde klıentter bolǵan joq. Belgisiz adamdar bank qyzmetkerlerin qarýmen qorqytyp, aldyn ala málimetter boıynsha 2 mln teńgeni alyp ketken. Abyroı bolǵanda, qyzmetkerlerdiń eshqaısysy zardap shekken joq. Polıtsııa dabyl soǵyla salysymen, kóp uzatpaı keldi.

Kaspi.kz qaýipsizdik qyzmeti quqyq qorǵaý organdarymen birlesip áreket jasaýda. Qylmyskerler tabylyp, zań boıynsha jazalanady»,– dep habarlady polıtsııadan.