Almatyda bankten eki mlrd teńge urlaǵan transulttyq uıymnyń músheleri sottaldy
Agenttik taratqan málimetke sáıkes, 2 mlrd teńge urlaǵan «Karbanak/Kobalt» transulttyq kıberqylmystyq uıymynyń músheleri sottaldy. Almaty prokýratýrasy agenttiktiń kómegimen qylmyskerler áreketiniń júıeliligin qalpyna keltirip, qajetti dálelder bazasyn jınaqtaı aldy.
2019-2020 jyldary qarjy retteýshisiniń qyzmetkerleri alǵash ret bankterge jasalǵan kıbershabýyldar faktileri boıynsha qylmystyq isti tergep-tekserý kezinde prokýratýraǵa kómek kórsetti.
«Biz jasalǵan qylmystardyń tsıfrlyq dálelderin jınap, taldaý jasaýǵa kómektestik. Sonyń nátıjesinde hakerlerdiń áreketterin sot urlyq, zańsyz joıý, aqparatty túrlendirý, aqparattyq júıeniń jumysyn buzý jáne aqparatty zańsyz alý dep jiktedi. Transulttyq qylmystyq toptyń qatysýshylary mundaı urlyq jasaý úshin arnaıy qalyptastyrylǵan zııandy kompıýterlik baǵdarlamalardy paıdalanyp osy áreketterdi 2016-2017 jyldary ekinshi deńgeıdegi eki bankke qatysty jasaǵan», - dedi kıberqaýipsizdik basqarmasynyń bólim bastyǵy Anatolıı Pýdel.
Prokýratýra men agenttiktiń birlesken qyzmetiniń nátıjesinde materıaldar daıyndalyp, Almaty qalasy Bostandyq aýdandyq sotyna berildi jáne qylmystyq toptyń eki qatysýshysyna qatysty aıyptaý úkimi shyǵaryldy. Sot olarǵa 8 jyl bas bostandyǵynan aıyrý túrinde jaza taǵaıyndady. Qylmystyq toptyń qalǵan músheleri anyqtalyp, olarǵa halyqaralyq izdeý jarııalandy.
«Tergeý «Karbanak/Kobalt» transulttyq kıberqylmystyq tobynyń joǵaryda kórsetilgen qylmysty jasaý kezinde 13 eldiń aýmaǵynda áreket etkenin jáne 2 mlrd teńgeden asa jymqyrǵanyn, sondaı-aq taǵy 8 mlrd teńgeni urlaý boıynsha áreketi sátsiz bolǵanyn dáleldedi. Olar qylmystyq oıyn birneshe kezeńmen iske asyrǵan: bankterge zııandy faıldar salynǵan elektrondyq hattar jibergen, olardy ashqan kezde kompıýterler bir-birin zaqymdaı bastaǵan. Hakerler qashyqtan basqarý rejıminde bank qyzmetkerleriniń qupııasózderin urlaý úshin baǵdarlamalar ornatqan, 200-den asa tólem kartasyn ashqan, bankterdiń protsessıng júıelerine ruqsatsyz ákimshilik turǵydan qol jetkizgen. Odan keıin tólem kartalaryna kóp mıllıondy kredıttik lımıtter belgilegen, bankomattardan qarajat alýǵa qoıylǵan shekteýlerdi alyp tastaǵan, odan ári qarajat túrli elderdegi bankomattar arqyly qolma-qol aqshaǵa aınaldyrylǵan», - dep túsindirdi Anatolıı Pýdel.
Almaty prokýratýrasynyń derekteri boıynsha, «Karbanak/Kobalt» – bul búkil álemdegi bankterge shabýyl jasaýmen aınalysqan transulttyq kıberqylmystyq uıym. Olar álemniń 40 elinde 100-den asa qarjy uıymyn tonaǵan, olardyń qyzmetinen bolǵan shyǵyn shamamen 1 mlrd dollardy quraıdy.
