Almatyda bank qyzmetkerleri arasyndaǵy Spartakıadaǵa 300-den astam adam qatysýda (FOTO)
Oǵan elimizdiń birinshi deńgeıdegi banki - QR Ulttyq Banki jáne ekinshi deńgeıdegi bankter - «Kazkommertsbank» AQ, «Qazaqstan Halyq Banki» AQ, «Sberbank Rossıı» AQ, «Delta Bank» AQ, «Al Hilal» Islam Banki» AQ, «ForteBank» AQ, «Eýrazııalyq bank» AQ, «Kapıtal bank Qazaqstan» AQ, «Tengrı bank» AQ, «Qazaqstan eksımbanki» AQ, «Bank RBK» AQ - barlyǵy 12 bankten 300-den astam qyzmetkerler qatysýda.
«Spartakıada «Sporttyq Almaty» baǵdarlamasy aıasynda ótip jatyr. Bizdiń basty maqsatymyz - qalalyqtardy sportpen aınalysýǵa tartý. Salamatty ómir saltyn nasıhattaý. Sondyqtan, biz qazir Almatyda apta saıyn buqaralyq sporttyq sharalar ótkizip jatyrmyz. Bul jerde árıne vedomstvalyq spartakıadalardyń alar orny bólek. Buǵan deıin quqyq qorǵaý organdary, medıtsınalyq qyzmetkerler, memlekettik qyzmetkerler, múmkindigi shekteýli jandar arasynda Spartakıada ótkizgen bolatynbyz. Búgin minekı, bank sektory salasynda da uıymdastyrdyq. Jyl sońyna deıin balalar-jasóspirimderge arnalǵan baǵdarlama aıasynda da qaladaǵy barlyq 200-den astam mektepti qamtı otyryp Spartakıada ótkizýdi josparlap otyrmyz», - dedi jýrnalısterge bergen suhbatynda Almaty qalalyq Dene shynyqtyrý jáne sport basqarmasy basshysynyń mindetin atqarýshy Rústem Baıseıitov.
Al, QR Táýelsizdiginiń 25 jyldyǵy men Almatynyń 1000 jyldyq mereıtoıyna arnalǵan Spartakıada ádettegideı qatysýshy komandalardyń kóńildi sherýimen bastaldy. Komandalar minber aldynda sap quryp turǵan soń, týtuǵyrǵa Memlekettik Tý kóterilip, Memlekettik Ánuran shyrqaldy. Budan keıin Almaty qalalyq Dene shynyqtyrý jáne sport basqarmasy basshysynyń mindetin atqarýshy Rústem Baıseıitov qatysýshylardy spartakıadanyń bastalýymen quttyqtady. Jarysqa 12 komandanyń qatysyp jatqandyǵyna rızashylyǵyn bildirip, korporatıvtik sporttyń ujymdy biriktire túsetindigin, jańa jetistikterge bastaıtyndyǵyn aıta kele, qatysýshylarǵa sáttilik tiledi.
Spartakıada sporttyń qol kúres, jeńil atletıka (estafeta 50m*4), shaǵyn fýtbol, ústel tennısi, toǵyzqumalaq jáne jaǵajaı voleıboly túrleri boıynsha ótip jatyr. Ul-qyzdardan quralǵan ár komandada 20-dan astam oıynshydan bar. Olardyń jas erekshelikterine shekteý qoıylmaǵan. Degenmen, deni jastar. Ár komanda músheleriniń kıgen jeıdeleri bir-birine uqsamaıdy. Osy Spartakıadaǵa arnaıy ázirlengen.
Al, Spartakıada odan ári jalǵasýda. Jaıma-shýaq aýa-raıy da jarystardyń kóńildi ótýine oń áser etýde. Ádette kúni boıy esep-qısappen aınalysatyn baısaldy keńselik qyzmetkerler búgin erekshe kóńildi. Júzderi bal-bul janyp, stadıondy jańǵyrtyp, bir-birin qyzý qoldap, jarystarǵa zor yqylaspen qatysýda.
