Almatyda balýandar men kúres ónerine qatysty kitaptyń tusaýy kesildi
NUR-SULTAN. QazAqparat – Almatydaǵy Jambyl atyndaǵy Memlekettik jasóspirimder kitaphanasynda «Balýan tas. Balýandar men kúres ónerine baılanysty ańyz-áfsanalar, qıssa-dastandar, el aýzyndaǵy áńgimeler (tarıhı derekter)» atty eki tomdyq kitap kópshilikke tanystyryldy, dep habarlaıdy QazAqparat tilshisi.
Kitaptyń avtory – mádenıettanýshy-lıngvıst Abylaıhan Qalnazarov. Eńbekke qazaq halqynyń kóne túrki-ıslam dáýirinen beri jasaǵan palýandary men kúres óneri týraly ańyz-áfsanalar, qıssa-dastandar, el aýzyndaǵy áńgimeler, keıbir jekelegen tarıhı derekter engizilgen.
«Qazaqtyń baıaǵy batyrlary jekpe-jek óneriniń barlyq qyryn jetik meńgergen. Naızagerlik, qylyshtasý, qamshygerlik, judyryqtasý, aýdaryspaq, kókpar, balýan kúres. Mundaı qasıetti óner adamǵa jaıdan-jaı qona salmaıdy. Mundaı óner atadan balaǵa mura bolyp, urpaq almasqan saıyn úzdiksiz jetilip, ushtalyp otyrady. Bul degenińiz – bútin bir halyqtyń ǵasyrlar boıy qalyptastyrǵan palýandyqqa negizdelgen jekpe-jek mektebi», – dedi Abylaıhan Qalnazarov oqyrmandarmen kezdesýde.
Sharaǵa almatylyq kitapsúıer qaýym men zııalylar, aqyn-jazýshylar men BAQ ókilderi qatysty.
Aıta keteıik, buǵan deıin kitaptyń tusaýy byltyr jeltoqsan aıynda Táýelsizdiktiń 30 jyldyǵy jáne Qajymuqan Muńaıtpasulynyń 150 jyldyǵyna oraı astanadaǵy QR Ulttyq mýzeıi Ǵylymı kitaphanasynda kesilgen bolatyn.
