Almatyda balmuzdaq merekesinde 3000-ǵa jýyq shar áýege ushyryldy (FOTO)
ALMATY. QazAqparat - Búgin Almatyda ortalyq mádenıet jáne demalys saıabaǵynda «BalmuzDAY» balmuzdaq festıvali ótti. «Biz turǵyndar arasynda osyndaı merekege degen qajettiliktiń bar ekendigin anyqtadyq.
Óıtkeni, biz shyntýaıtyna kelgende balalarǵa az kóńil bólemiz. 1 maýsymnan basqa, balalarǵa arnalǵan keń aýqymdy mereke joq dese de bolady. Árıne, Almatyda buǵan deıin de balmuzdaq festıvaldary ótkizilgen. Biraq, mynadaı keń kólemdi mereke birinshi ret uıymdastyrylyp otyr. Bul merekege kem degende 18 myńdaı adam qatysady dep otyrmyz. Festıval keshke deıin jalǵasady. Qazirdiń ózinde adamdar kóptep kelip jatyr. Saıabaqtyń basty sahnasynda Murat Mutyrǵanov bastaǵan ártister óner kórsetýde. Kontserttik baǵdarlama aıaqtalǵan soń, flesh-mob formatynda áýege 3000-daı shardy ushyramyz. Bizge «Aıala» qoǵamdyq qory qoldaý kórsetti. Olar merekeni atap ótýge balalar úıiniń tárbıelenýshilerin alyp keldi. Sondyqtan, bul jáı kóńil kóteretin shara emes, áleýmettik mańyzy bar mereke», - dedi festıvaldi uıymdastyrýshy, ıvent-maman Oksana Trıhanova.
Mereke barysynda qaladaǵy balmuzdaq óndirýshi jetekshi kompanııalar balmuzdaqtardy arzan baǵamen satty.
Balalardy Murat Mutyrǵanov pen kishkentaı qar adamy -ıetı -«Balmuzdaq» adamy qarsy alyp jatty. Ol balalarǵa balmuzdaqty qalaı durys jeý kerektigin úıretti. Onyń kómekshileri - «aq aıý», aqqala, «balpanaq» jáne alıaskalyq qyz. Olar balmuzdaqtyń tarıhy jáne eń dámdi balmuzdaqtardyń qaıda satylatyndyǵyn aıtady.
Sahnada Murat Mutyrǵanov jáne qýyrshaq teatry, «Ýlybka» balalar ujymy, Funky Town bı toby óner kórsetti.
Mereke sońynda áýege 3000-daı shar ushyryldy. 
