Almatyda balqar halqynyń aqyny Qaısyn Qulıevti eske aldy
Bul jıynnyń ótýine TÚRKSOI halyqaralyq uıymy men ýnıversıtettiń Shyǵystaný fakýlteti TÚRKSOI kafedrasynyń ujymy muryndyq boldy.
Qaısyn Qulıevtiń shyǵarmashylyǵyna arnalǵan dóńgelek ústelge Shyǵystaný fakýltetiniń dekany Yqtııar Paltóre, Halyqaralyq TÚRKSOI uıymyndaǵy Qazaqstannyń ókili Asqar Turǵanbaev, Qazaqstan Jazýshylar odaǵy basqarma tóraǵasynyń birinshi orynbasary Ǵalym Jaılybaı, Túrki mádenıeti ortalyǵynyń basshysy Ahmet Daǵduran, ádebıetshi ǵalymdar Dandaı Ysqaquly men Álimjan Hamraev, «Turan álemi» qoǵamdyq uıymynyń basshysy Karlın Mahpırov, aqyndar Ádilǵazy Qaıyrbekov, Maqpal Mysa jáne Qazaqstandaǵy túrkitildes halyqtardyń ókilderi, ýnıversıtet oqytýshylary men stýdentter qatysty.
Jıynda sóz alǵan Halyqaralyq TÚRKSOI uıymyndaǵy Qazaqstannyń ókili Asqar Turǵanbaev Qaısyn Qulıevtiń 100 jyldyq mereıtoıy túrki áleminde qalaı atalyp ótkeni jaıly aqparatpen bólisip, osy baǵyttaǵy TÚRKSOI uıymynyń Ázirbaıjan, Qyrǵyzstan, Qazaqstan jáne Túrkııada ótkizgen sharalary týraly áńgimelep berdi.
Shara barysynda Qaısyn Qulıevtiń jeti tilde sóılegen «Táńiriniń qylyshy» atty kitabi men «Bul taýlar turyp turǵansha» dep atalatyn oleńder jınaǵynyń tusaýy kesildi. Eki kitapty da Halyqaralyq TÚRKSOI uıymy basyp shyǵarǵan.
«TÚRKSOI halyqaralyq uıymy túrki dúnıesine qatysty sharalardy udaıy joǵary deńgeıde uıymdastyryp keledi. Qaısyn da - túrki jurtyna ortaq úlken tulǵa. Ol - úlken taǵdyr ıesi. Aqyndyqtyń baqytyn da, azabyn da keshti. Halqymen birge aıdaýda da boldy. Soǵystyń da aýyrtpalyǵyn kórdi. Balqar degen halyqtyń baıraǵyn kóterip, balqardyń almas qylyshy bolyp,tutas halyqtyń únine, jyryna, namysyna aınaldy», - deıdi aqyn, Qazaqstan jazýshylar odaǵy basqarma tóraǵasynyń birinshi orynbasary Ǵalym Jaılybaı.
Sonymen birge professor, ádebıet synshysy Dandaı Ysqaquly Qaısyn Qulıev shyǵarmalaryn oqytý men túrkige ortaq ádebıet oqýlyǵyn jazý máselesine keńinen toqtaldy. Ádebıet zertteýshisi, professor Álimjan Hamraev ta ortaq ádebı dástúrler týraly oı qozǵady.
Jıyn sońynda elimizdegi túrki halyqtarynyń ókilderi óz oılaryn ortaǵa salyp, Qaısyn Qulıevtiń balqar jurtynda bolǵan uly toıyna qatysyp qaıtqan qalamger Ádilǵazy Qaıyrbekov estelik aıtyp, aqynnyń óleńderin oqydy.
