Almatyda «Balbyraýyn» kúıin bir mezette 500 dombyrashy oryndady
ALMATY. QazAqparat - Almatyda Ulttyq dombyra kúnine oraı bir mezette 500 dombyrashy Qurmanǵazynyń «Balbyraýyn» kúıin oryndady. Bul merekege arnaıy jasalǵan tartý bolatyn, dep habarlaıdy QazAqparat tilshisi.
Arbat alańynda ashyq aspan astyndaǵy saltanatqa júzdegen adam dombyrasyn arqalap keldi. «Sazgen sazy», Alataý dástúrli óner teatrynyń folklorlyq-etnografııalyq ansambli, Qazaqstan Respýblıkasy Ulttyq ulany «Ońtústik» óńirlik qolbasshylyǵynyń sarbazdary men mektep oqýshylary bir mezette Qurmanǵazynyń áıgili «Balbyraýyn», «Adaı» kúılerin, Nurǵısa Tilendıevtiń «Ata tolǵaýyn» oryndaýdan «fleshmob» uıymdastyrdy.
«Qazaqtyń atyn tanytatyn dombyraǵa Elbasymyz kún arnap, ony ulyqtaýdamyz. Eki ishekten turatyn osynaý aspapta tek halyq kúılerin ǵana emes, Motsarttyń, Shopenniń jáne basqa da ulttardyń týyndylaryn oınaýǵa bolady»,-dedi «Alataý» dástúrli óner teatrynyń dırektory Berik Júsipov.
Sondaı-aq bul kúni Almaty turǵyndary men qonaqtary úshin dombyrada oınaý men ony jasaýdan sheberlik sabaqtary uıymdastyrlyp, dombyrashylardyń fotokormesi men sándik-qoldanbaly óner jármeńkesi ótti. Kórermender arasynda dombyrada oınaýdan saıys ótkizilip, mýzykalyq vıktorınalar oınatyldy.
