Almatyda «balbulaq.kz», «economika-qun.kz» jáne «kazmunai.kz» atty memlekettik tilde shyǵatyn úsh web-saıttyń ashylý rásimi ótti
TANA. 7 qyrkúıek. QazAqparat. Búgin Almatyda «Memlekettik tildi damytý» Prezıdenttik qory «QazMunaıGaz» UK» Aktsıonerlik qoǵamynyń qoldaýymen ázirlengen balalarǵa arnalǵan balbulaq.kz tanymdyq portalynyń, ekonomıkalyq taqyryptaǵy «economika-qun.kz» jáne munaı, gaz taqyrybyna arnalǵan kazmunai.kz dep atalatyn úsh ınternet-saıttyń ashylý rásimin ótkizdi,
dep habarlaıdy «Memlekettik tildi damytý» Prezıdenttik qorynyń baspasóz qyzmeti.
Jınalǵan qaýymǵa jańa saıttardy «Memlekettik tildi damytý» Prezıdenttik qorynyń dırektory Azat Sháýeev, «QazMunaıGaz» UK AQ-nyń Baspasóz hatshysy Ǵalym Tumabaev, «QUN+K» JShS redaktory Berik Áshimov, «Abaı-aqparat» qazaq Internet keńistigin damytý qory» qoǵamdyq qorynyń prezıdenti Dáýren Qýat, «Nazar» Qazaq jýrnalısteriniń Qoǵamdyq qorynyń PR-menedjeri Jandos Smaıylov tanystyrdy.
Memlekettik tildiń elektrondyq-aqparattyq keńistikte damýyn qamtamasyz etý maqsatynda otandyq saıttarǵa qoldaý kórsetý Qordyń basty basymdyqtarynyń biri bolyp tabylady. Mysaly, 2009-2010 jyldary qazaqtildi ınternet keńistiginde joǵary qoldanys kórsetkishine ıe bolǵan 6 túrli baǵyttaǵy jańa ınternet-saıttar Qordyń qoldaýymen ashylǵan bolatyn.
Búgingi ashylyp otyrǵan úsh web-saıt Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyna sáıkes jáne Táýelsizdiktiń 20 jyldyǵyna oraı josparlanǵan is-sharalar aıasynda júzege asyp otyr.
«balbulaq.kz» saıtynda bastaýysh klass oqýshylaryna arnalǵan oqý-ádistemelik quraldar, ertegiler, ańyz-áńgimeler, mýltfılmder men basqa da túrli baǵyttaǵy aqparattyq-tanymdyq materıaldar toptastyrylǵan. Portal 6-10 jas aralyǵyndaǵy balalarǵa arnalǵan.
«economika-qun.kz» saıtynan elimizdiń ekonomıkasynyń búgingi tynys-tirishiligin, qarjy jáne ekonomıka salalary boıynsha aqparattyq-saraptamalyq materıaldaryn, sarapshylardyń oı-pikirlerin, ekonomıkalyq termınder sózdikteri men valıýta kórsetkishterin, osy saladaǵy normatıvtik-quqyqtyq aktilerin memlekettik tilde kórýge bolady.
«Kazmunai.kz» óz qoldanýshylaryn munaı jáne gaz óndirisi salasynyń jańalyqtarymen, osy salanyń damý tarıhy jáne ǵylymı-zertteý jumystarynyń materıaldarymen qamtamasyz etip qoımaı, sonymen qatar otandyq jáne halyqaralyq munaı jáne gaz óndirisi salalary naryǵyndaǵy ózgeristermen aqparattandyryp otyrady.
