Almatyda balasyn qutqarý úshin ana otqa oranǵan úıge kirip ketken
ALMATY. QazAqparat - Almatyda «Mersedes» kóligindegi mas júrgizýshi gaz qubyryn soǵyp, saldarynan bir úı órtke orandy, dep habarlaıdy QazAqparat tilshisi Almaty PD baspasóz qyzmetine silteme jasap.
Oqıǵa keshe túnde Bostandyq aýdanynyń aýmaǵynda oryn aldy. «Mersedes» kóligindegi mas júrgizýshi gaz qubyryn soqqan. Tabıǵı gazdyń aǵýy saldarynan, turǵyn úı órtendi. Ottyń ortasynda qalǵan 11 jasar qyzdy jáne eki er adamdy polıtsııa qyzmetkerleri qutqardy.
«Jolda aldymyzdan bir áıel júgirip shyǵyp, búkil otbasy úıdiń ishinde qalǵanyn aıtty, ol qatty qorqyp ketken. Ózi órtenip jatqan úıge kirýge umtyldy. Meniń áriptesim, polıtsııa serjanty Almaz Ásetpen birge úı ıelerin tabý úshin qyzyl jalynyń ishinen izdeý týraly sheshim qabyldandy. Baqytymyzǵa oraı, jalyn negizgi qurylymǵa jete almady, biraq órt osy úıdiń aýlasyndaǵy basqa ǵımarattardy tolyǵymen sharpyǵan.11 jastaǵy qyzdy jáne taǵy eki er adamdy qutqaryp úlgerdik. Olardyń ómirine qaýip tónip turǵan joq. Órt sóndirý brıgadasy otty tolyqtaı sóndirdi», - deıdi patrýldik polıtsııa ınspektory Baýyrjan Jeksembıev.
Óz kezeginde, polıtseıler balasynyń amandyǵy úshin otqa túsýge ázir bolǵan áıeldiń erligin aıtty.
«Analyq mahabbat – bul uly sezim. Áıel qaýip-qaterge qaramastan, balasyn qutqarýǵa daıyn boldy jáne bizge kóp kómektesti», - dedi aǵa serjant Jeksembıev.
