Almatyda «Balapan» baǵdarlamasy jospardan asyra oryndalýda - Serik Seıdýmanov
ALMATY. Qazannyń 1-i. QazAqparat /Erbol Turymbetov/ - Almaty qalasy boıynsha bıyl 15 balabaqsha salý josparlanǵan.
Alaıda, búginge deıin 16 balabaqsha qoldanysqa berilip, jospar asyra oryndalýda. Bul týraly Almaty qalasy ákiminiń orynbasary Serik Seıdýmanov búgin jýrnalısterge bergen suhbatynda aıtty.
«Buryn KSRO zamanynda qalamyzda 350 balabaqsha jumys istegen edi. Qazirgi ýaqytta onyń sany 182-ge qysqaryp ketken. Al halyq sany kerisinshe kóp ulǵaıdy. Bul qıyn máseleni tez arada sheshý bir memlekettiń qolynan keletin sharýa emes. Al, soǵan baılanysty qabyldanǵan respýblıkalyq kólemdegi «Balapan» baǵdarlamasynyń úlken bóligin memlekettik jobalar qurap otyr», deıdi S. Seıdýmanov. Onyń aıtýynsha, bıyl Almatyda bir mektepte 1-shi synypqa qabyldanǵan oqýshylardyń jalpy sany 23 synypqa deıin jetken. Bul buryn-sońdy bolmaǵan oqıǵa.
Tek búginniń ózinde Almaty qalasynda 2 birdeı balabaqsha paıdalanýǵa berildi. Sonymen, Almatydaǵy balabaqshalar sany 184-ke jetip otyr.
«Respýblıkalyq baǵdarlamadaǵy memlekettik jobalar bólimi 4 salaǵa bólingen. Ol boıynsha jańa balabaqshalar salý, jekemenshikke ketkenderin qaıtaryp, jóndeýden ótkizý jumystary qarastyrylǵan. Sonymen qatar, jekemenshik jáne qalalyq mektepke deıingi daıarlyq ortalyqtaryn ashý men jańa jekemenshik balabaqshalar salý josparlanǵan», deıdi ol.
