Almatyda balanyń ústine oıynshyq músin qulaý oqıǵasy: Polıtsııa tekserý júrgizip jatyr
ALMATY. QazAqparat - Polıtsııa Almatydaǵy «Mega» oıyn-saýyq ortalyǵyndaǵy oqıǵaǵa qatysty túsinikteme berdi, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, qazirgi ýaqytta bul derekti Bostandyq aýdandyq polıtsııa basqarmasy tergep jatyr.
«Qazir balanyń alǵan jaraqattarynyń aýyrlyǵyn anyqtaý úshin sot-medıtsınalyq saraptama taǵaıyndaldy. Atalǵan is óndirisi saraptama qorytyndysy daıyn bolǵannan keıin jalǵasyp qandaı shara qoldanylatyny belgili bolady», - dep habarlady polıtsııadan.
Oqıǵaǵa qatysty «Mega» oıyn-saýyq ortalyǵynyń baspasóz qyzmeti de túsinikteme berdi.
«Marwin» dúkeninde bolǵan oqıǵa, árıne, ókinishti.
«Biz óz tarapymyzdan oıyn-saýyq ortalyǵynda ornalasqan, onyń ishinde Marwin dúkenindegi barlyq konstrýktsııa men zattardyń berik ornyǵýyn qaıta tekseremiz», - delingen habarlamada.
«Marwin» dúkender jelisiniń bas dırektory Vadım Golenkonyń aıtýynsha, zardap shekken balaǵa barlyq kómek kórsetilip jatyr.
«Bizdiń tehnıkalyq qyzmetkerler oıynshyq-músindi alyp, onyń qulaý sebebin anyqtap jatyr. Buǵan qosa bizdiń dúkendegi osyǵan uqsas barlyq fıgýralar alynyp tastaldy. Balanyń ata-anasymen turaqty baılanystamyz jáne densaýlyǵy qalypqa kelgenshe barlyq kómek kórsetýge daıynbyz. Qazir bala úıinde», - deıdi dúken ókili.
Aıta keteıik, Almatydaǵy «Mega» SOO-da balanyń ústine oıynshyq músin qulap ketken bolatyn. Saldarynan kishketaı balanyń mıy shaıqaldy.
