Almatyda «Balalarǵa ómir syıla» aktsııasy bastalǵaly beri 307 bala qutqaryldy

Bul týraly búgin Almatyda atalmysh qordyń esep berý baspasóz máslıhatynda «DOM» qorynyń jetekshisi Arýjan Saın aıtty.

Onyń aıtýynsha, 2007 jyldyń aqpan aıynyn 2011 jyldyń naýryz aıyna deıin balalardyń emdelýine jınalǵan qarajat 1 mıllıon 754 myń AQSh dollardy quraǵan. «Bul ata-analardyń jeke esep shotyna túsken qarajattardy eseptemegendegi jalpy soma. Osy ýaqytqa deıin, myńdaǵan qazaqstandyqtardyń kómegi arqasynda aýyr naýqaspen, ólim aýzynda jatqan kóp balaǵa ota jasalyp, búginde olar ata-analarynyń janynda baqytty ómir súrýde. Bul aktsııa áli de jalǵasatyn bolady, óıtkeni ondaı kómek kútken balalardyń sany odan ári artýda. Sondyqtan da, bizder men sizderdiń jumystaryńyzdyń tıimdiligi odan da joǵary bolýy kerek»,-dedi A.Saın.

Jıynda qordyń basshysy qaıyrymdylyq uıymnyń www.detdom.kz saıty qaıta jańartylǵandyǵyn, sonymen qatar, «Habar» telearnasynan «Balalarǵa ómir syıla» atty baǵdarlamanyń kúnde shyǵatyndyǵyn habarlady.

Eseptik sharaǵa aktsııa aıasynda kómek alǵan otbasylar, sonymen qatar, eriktiler, demeýshiler, tanymal qoǵam qaıratkerleri, bıznestiń, ÚEU-dyń ókilderi qatysty. Sondaı-aq, «Motor-Roller» toby men «Antre» balet stýdııasynyń ónerpazdary qatysyp, óz ónerlerin kórsetti.