Almatyda balalarǵa aýlada fýtbol, basketbol oınaýǵa tyıym salyndy
ALMATY. QazAqparat – Almaty qalasynyń bas sanıtarlyq dárigeri Jandarbek Bekshın onlaın brıfıng barysynda QR Memleket basshysynyń málimdemesinen keıin balalardy aýlada oınatý tártibiniń jańa erejesin túsindirdi, dep habarlaıdy QazAqparat tilshisi.
«Balalar alańyn paıdalaný boıynsha Prezıdenttiń málimdemesinde aıtylǵan tapsyrmany oryndaý maqsatynda jan-jaqty talqylap arnaıy qaýly shyǵardyq. Qazir Almaty qalasynyń turǵyndaryna tańǵy 6:00-den keshki 21:00-ge deıin balalar jáne demalys alańdaryna shyǵýǵa ruqsat berildi. Biraq arnaıy talaptarymyz bar. 14 jasqa deıingi balalardyń ata-anasy mindetti túrde qasynda bolýy kerek. Mindetti túrde betperde kııý kerek. Úı aýlasynan syrtqa shyqpaýy kerek. Dalaǵa shyqqan kezde úsh adamnan artyq jınalýǵa bolmaıdy. Adamdar aralyǵynda qashyqtyq 2 metr bolýy tıis», - dedi Jandarbek Bekshın.
Sonymen qatar almatylyqtarǵa aýlada sportpen aınalysýǵa tyıym salyndy.
«Sanıtarlyq ereje eń aldymen koronavırýs qaýpiniń aldyn alýǵa arnalǵan. Osy oraıda mynandaı usynys berip jatyrmyz. Balalar shoǵyrlanbaýy úshin fýtbol, basketbol sııaqty oıyn oınaýǵa tyıym salynady», - dedi Jandarbek Bekshın.
Qala ákiminiń birinshi orynbasary Erlan Qojaǵapanovtyń aıtýynsha, karantınge jabylǵan vırýs oshaqtary sanalatyn úılerdiń turǵyndaryna aýlaǵa shyǵýǵa qatań tyıym salynady.
