Almatyda balalarǵa arnalǵan jańa ortalyq ashylady
ALMATY. QazAqparat – Naýryzbaı aýdanynda jańa oqýshylar saraıy boı kóteredi. Bul nysan balalarǵa arnalǵan ınnovatsııalyq ortalyq bolmaq, dep habarlaıdy QazAqparat tilshisi.
Oqýshylar saraıy týraly Naýryzbaı aýdanynyń ákimi Sanjar Toǵaı qoǵamdyq keńes otyrysynda aıtty.
«Qazir biz bul máseleni qarastyryp jatyrmyz. Oqýshylar úıiniń jobasyn ázirlep qoıdyq. Oqýshylar saraıyn balalarǵa arnalǵan ınnovatsııalyq ortalyq deýge bolady. Ákimdiktiń janyna osy maqsatta 1 ga jer bólindi. Qazir ol jerde muz aıdyny tur. Bıyl muz aıdyny alynǵan soń ornyna qurylysty bastaımyz», - dedi aýdan ákimi Sanjar Toǵaı.
Aıta ketý kerek, bul másele Baqytjan Saǵyntaevtyń esep berý kezdesýinde turǵyndar tarapynan kóterilgen bolatyn. Naýryzbaı aýdanynyń turǵyndary qalanyń ortalyǵyndaǵy balalarǵa arnalǵan úıirmelerge jetý qıyn dep shaǵymdanǵan bolatyn.
