Almatyda balalarǵa arnalǵan hospıs ashýǵa baılanysty qaıyrymdylyq joba bastaldy
ALMATY. Maýsymnyń 24-i. QazAqparat /Názıra Eleýhan/ - Qazirgi ýaqytta Qazaqstanda balalar onkologııa máselesi ózekti bolyp otyr. Respýblıkamyzda 4 balalar onkologııalyq bólimi ǵana bar, onkolog-dárigerler jetispeıdi, sonyń saldarynan balalardaǵy qaterli isik aýrýlary asqynǵan kezde, 3-4-shi satysynda anyqtalýda.
Bir ǵana ońtústik astananyń ózinde hospıstiń kómegine zárý 200-den astam búldirshin bar. Sondyqtan elimizde Balalar hospısi bolýy qajet. Biz buǵan deıin osy máselege baılanysty Almatyda qaterli isik aýrýlaryna shaldyqqan sábılerdi emdeýge arnalǵan hospısti ashý máselesin kótergen bolatynbyz. Bul bastama búginde qala ákimdigi tarapynan qoldaýǵa ıe bolyp, qalalyq densaýlyq saqtaý basqarmasymen birlese sheshimin tabýda. Bul týraly búgin Almatyda ótken arnaıy baspasóz máslıhatynda "Salaýatty Azııa" qoǵamdyq qorynyń dırektory Naǵıma Plohıh aıtty, dep habarlaıdy QazAqparat.
Onyń aıtýynsha, qazirgi ýaqytta memlekettik jáne kommertsııalyq mekemeler, uıymdar men halyqaralyq kompanııalar tartylýda. "Qazirgi ýaqytta qala bıýdjetinen ǵımaratty jóndeýge qarajattar bólindi. Tolyqtaı hospısti ashýymyz úshin 67 mıllıon teńge jınaýymyz kerek. Ol hospıs eń aldymen moraldyq qoldaýǵa muqtaj búldirshinderge qajet. Bizdiń bastamamyzǵa alǵashqylardyń biri bolyp, KaR-Tel» kompanııasy kómekke shyqty. Osy kompanııamen birge «Men senimen birgemin: Hospıs - balalarǵa» atty qaıyrymdylyq joba aıasynda SMS-aktsııa ótetin bolady. Qaýipti dertke shaldyqqan balalardyń taǵdyryna beı-jaı qalmaıtyn barlyq qazaqstandyqtardy aktsııaǵa qatysýǵa shaqyramyz. Ol úshin «Beeline» brendine 5353 nómirin terip jiberse bolǵany. Habarlamanyń baǵasy -50 teńge. Aýyr dertke shaldyqqan balalar bizdiń eldiń balalary, sondyqtan "bóten bala bolmaıdy" demekpin, olarǵa kómektesý úshin kúshimizdi biriktirip, "Biz senimen birgemiz" dep aıtýymyz kerek", dedi Naǵıma Plohıh. Onyń aıtýynsha, hospıstiń ashylýy jınalatyn qarajattarǵa baılanysty.
Baspasóz máslıhatyna arnaıy qatysqan qala ákiminiń orynbasary Serik Seıdýmanov qala qazynasynan hospıstiń kúrdeli jóndeý jumystaryna 60 mıllıon teńge qarajat bólingendigin aıtty. "Balalarǵa arnalǵan hospıske Basenov kóshesindegi №2 úı beriletin bolady. Men ár adamdy, ár almatylyqty bul máseleniń ózektiline mán berip, mańyzdylyǵyn túsinse deımin. Shynymen de "bóten bala bolmaıdy" bári bizdiń eldiń balalary", dedi Serik Seıdýmanov.
Medıtsınalyq málimetterge súıensek, jylyna 500 kishkentaı baladan qaterli isik aýrýy anyqtalady eken. Onyń 40 paıyzy aıyqpas derttiń saldarynan jaryq dúnıemen qoshtasady. Qazirgi kezde aýyr syrqatty adamdarǵa (úlkenderge) arnalǵan qamqorlyq úıleri elimizdiń Almaty, Pavlodar, Óskemen, Qaraǵandy, Qostanaı, Semeı qalalarynda bar. Bul oryndarda onkologııalyq aýrýlarǵa jáne sozylmaly ınfektsııalyq dertke shaldyqqan syrqattar emdelýde.
