Almatyda balalarǵa arnalǵan fýtbol mektebi ashyldy
ALMATY. QazAqparat - Almatyda memlekettik-jekemenshik seriktestik negizinde fýtbol oınaýǵa arnalǵan zamanaýı sport kesheni esigin ashty, dep habarlaıdy QazAqparat.
Almatydaǵy qarapaıym «Spýtnık» stadıonynda tirshilik qaıtadan qyz-qyz qaınady. Endi munda «Jas qyran» atty zamanaýı sporttyq-jattyqtyrý kesheni ornalasady. Jańartylǵan stadıonda jańa nysannyń ashylý qurmetine alǵashqy dopty QFF prezıdenti Ádilbek Jaqsybekov, vıtse-premer Erbolat Dosaev, Almaty ákimi Baýyrjan Baıbek, «Jas Qyran» qazaqstandyq balalar men jasóspirimder fýtbol lıgasynyń prezıdenti, bıznesmen Berik Qanıev soqty. Sondaı-aq, ashylý saltanatynda QR Mádenıet jáne sport mınıstri Arystanbek Muhamedıuly, qazaqstandyq fýtbol ardagerleri Quralbek Ordabaev, Mıhaıl Gýrman, taǵy basqarlary qatysty.
«Memlekettik-jekemenshik seriktestik - bastamany iske asyrýǵa múmkindik beretin qural, biz qala tarapynan atalǵan nysandy 15 jylǵa basqarýǵa tapsyrdyq. Ózderińiz kórip turǵandaı, kóp qarajat jumsalǵan, stadıon, trıbýnalar jańartylyp, shatyry jóndeldi, úsh shaǵyn fýtbol alańy bar - zamanaýı standarttarǵa sáıkes barlyq jaǵdaı jasalǵan. Taıaý ýaqytta nysandy FIFA sertıfıkattaıdy», - dedi Almaty ákimi Baýyrjan Baıbek.
Boıyna qan júgirgen nysan 500-ge jýyq jas fýtbolshy jattyǵatyn, 25 jattyqtyrýshysy únemi aýysymda bolatyn naǵyz fýtbol ortalyǵyna aınaldy. Mundaǵy jattyqtyrýshylar shtaty 50 adamǵa deıin jetedi.
Almaty ákimi Ádilbek Jaqsybekovtyń qoldaýymen fýtbol jáne jeńil atletıkaǵa arnalǵan Ortalyq stadıonnyń qosymsha alańyn jańartý jumysy bastalatynyn baıandady.
«Kelesi jyly Ortalyq fýtbol alańyn jańartý jumystaryn bastamaqpyz, 30 myń adamǵa arnalǵan jabyq stadıon bolady. Qoldaýdyń arqasynda halyqaralyq standarttar boıynsha 5 myń orynǵa arnalǵan jeńil atletıkalyq jabyq stadıon salýdy bastaımyz. Almaty - cporttyq sharalar ortalyǵy. Jas sportshylarymyzdyń ata-analaryn quttyqtaımyn, olardan joǵary deńgeıdegi sportshylar ósip shyǵatynyna, elimizdiń laıyqty azamattary bolatynyna senimim zor. Memleket basshysy Nursultan Nazarbaevtyń qoldaýynyń arqasynda kóp balalar sportpen aınalysyp, bolashaqqa senimmen qarap, jańa Qazaqstandy qalyptastyrady», - dep túıindedi B.Baıbek.
